Walay kamatayon ang gugma

Gula 73

Midali si Jody sa paglikay dihang iyang nasuta nga modasmag gayod kaniya ang sakyanan. Tuod man, igo lang siyang nakadagan, mibangga ang awto sa poste diin sa duol nagbarog siya kaganina.

Gikuyawan si Jody nga naghunahuna sa hitabo.

Maayong pagkabuak sa bildo sa atubangan sa sakyanan. Ug nakita niya ang drayber niini nga nagkadugo nga nag-akmoy sa manibela. Daw wala nay panimuot.

Milingilingi si Jody. Walay laing tawo nga midugok aron pagsusi sa nahitabo. Layo man sab gud sa kabalayan ang dapit sa reclamation area diin nabangga ang sakyanan. Siya ra tingali si Jody ang nakakita sa maong hitabo kay naatol man sab niadtong higayona nga talagsa ra ang mga sakyanan nga nangagi.

Mibati si Jody og kaluoy sa tawo nga nagkadugo. Dihadiha iya kining giduol ug gitabangan. Dihang nakalantaw siya nga may sakyanan nga nagsingabot, iya kining gipara ug nagpatabang aron mahaw-as ang tawo gikan sa sakyanan niini nga nabangga.

Si Jody na mismo ang nangunay sa pagdala sa maong tawo nga samdon ngadto sa tambalanan. -- Sumpayan pa