Mosulay siya’g pangita og laing trabaho. Bisan unsang matanga sa trabaho basta lang makasapi. Basta dili supak sa kabubut-on sa Dios ug sa tawo.
Pero pakyas siya. Wala’y midawat kaniya sa tanan niyang giaplayan.
Alas kuwatro sa hapon. Gikang nangaplay si Jody. Naglakaw na lang siya pauli sa balay nga iyang giabangan kay wala na siya’y ikaplite. Ang demalas pa kay gibalon niya ang kapakyasan sa pagpangaplay sa iyang pagpauli.
Giabog-abogan lang si Jody sa mga sakyanan nga mangagi sa iyang tungod. Mora bag nagbugalbugal kaniya ang aso sa mga tambutso sa sakyanan. Naibog siya sa mga pasahero nga nanakay kay may ikaplite man sa sakyanan. Naglaway lang intawon siya sa mga sakyanan nga nangagi.
Giabot si Jody og kakapoy sa pagbinaklay. Mipahulay una siya’g makadiyot sa tungod sa usa ka poste sa elektrisidad.
Wala madugay, dihay sakyanan nga naghagiyos sa kakusog ang pagdagan nga nagsingabot sa iyang nahimutangan. Nagdangarang kini paingon kaniya. Mora bag nawad-an ang drayber sa kontrol niini. -- Sumpayan pa