Walay kamatayon ang gugma

 Gula 71

Nahisagmuyo siya pag-ayo.

Ang kataposan niyang giduol mao ang Mozart Publications ang gipanag-iya sa iyang amahan. Misulay siya’g aplay. Basin dag maluoy ang iyang amahan sa makaluluoy niyang kahimtang.

Apan gisudyaan na hinuon siya niini.

“Imo kanang tinuyoan,” matud ni Mr. Luis Garcia. “Kun dili pa tungod sa kamatinumanon mo sa imong gusto, dili unta kini mahitabo kanimo.”

Huyhoy ang iyang mga abaga nga migawas sa buhatan sa iyang amahan.”

Gi-withdraw na ni Jody ang kataposang kantidad nga sulod sa iyang bank account. Wala na siya’y laing mahimo pa. Wala na siya’y laing mahikap nga ikasagang sa iyang panginahanglan.

Nakahunahuna kadto siya nga mopauli na lang siya ngadto sa balay sa iyang amahan. Ipaubos niya ang iyang garbo. Mangayo siya’g pasaylo sa iyang Daddy. Apan gibakwi niya ang maong hukom. Nakaseguro siyang dili pa makadawat pagbalik kaniya ang iyang amahan.

Gawas pa, dili siya gustong makakita sa panagway ni Megan, ang iyang manghod nga mangingilog sa iyang kalipay. Dili usab siya gustong makakita sa panagway ni Randy. Maong mangita na lang gyud siya’g laing medyos sa iyang suliran. -- Sumpayan pa