Anino sa adlaw

Gula 53

Ang provincial police office director nga si Ernesto Villamor mitug-an ngadto sa mga tigbalita nga nalutsan og warrant of arrest ang mga gikatahapan human sila pasakai og sumbong sa usa ka tag-iya og yuta kinsa mipasangil kanila nga mi-harvest sa mga bunga sa mga mangga niini dul-an sa usa ka bulan na ang nakalabay.

Walay pagtugot gikan sa tag-iya sa mga tanom nga mangga ang pag-harvest sa mga suspek sa mga bunga niini maong mipasaka siya’g kaso. Gidudahan ug nabaniog na sa ilang dapit nga mga sakop sa walhong grupo ang mga suspetsado. Ang matag usa kanila pamultahon og P42,000 alang sa temporaryo nilang kagawasan kalabot sa kaso nga gipasaka batok nila. Mag-atubang pa usab sila’g imbestigasyon kalabot sa pasangil nga mga sakop sila sa rebeldeng pundok nga naglihok sa bukid.

Gipanghimakak ni Villamor ang mitumaw nga alegasyon nga gi-harass nila ang mga kabanay sa dinakpan nga nagpanon ngadto sa buhatan sa kapolisan aron mag-rally. Matud ni Villamor, gipatuman nila ang maximum tolerance.

Paglabay sa tulo ka adlaw, may laing gidudahang mga sakop sa walhong pundok ang nasikop na usab sa mga elemento sa kapolisan ug kasundalohan gumikan sa pagpananom og marijuana sa kabukiran. Nasakmit usab sa mga awtoridad gikan sa mga dinakpan ang mga armas nga tag-as og kalibre ug ingon man mga bala. -- Sumpayan pa