Anino sa adlaw

Gula 51

“Nagbasol ka ba sa nahitabo nato?”

“Wa man. Pero di ko lang kalikayan usahay ang paghunahuna kun unsa kahay kaugmaon sa umaabot tang anak.”

“Nakasabot ko sa imong bahin,” giingnan ni Ronald si Teresa. “Sa atong kahimtang karon, maglisod ko pagpasalig nimo og maayong kaugmaon sa umaabot tang anak.”

“Ayaw na lang hasola ang imong kaugalingon mahitungod niana,” matud ni Teresa. “Ang importante alang nako mao nga mag-amping ka didto sa bukid. Dili ko gustong matawo ang atong anak nga walay makitang amahan.”

“Way kasegurohan ang akong kinabuhi sa bukid, Teresa. Kanunay nagsunod ang hulga sa kinabuhi ug kamatayon. Apan tungod ug alang sa umaabot tang anak, doblehon ko ang akong pag-amping. Dili sab ko gustong mamatay nga dili makakita sa atong anak.”

Niadtong tungora, on board si Ricky Liwanag sa iyang tulumanon sa radyo. Iyang gituki ang mahitungod sa labing ulahing kasayoran nga iyang nahipos. Ang latest report nag-ingon nga nasuspenso na og unom ka bulan ang mayor sa ilang lungsod gumikan sa pasangil sa lapad nga pangurakot nga iya nang gibulgar sa kahanginan.

Mipadayag og kalipay si Ricky sa pagkasuspenso sa mayor. Nagpasalamat siya nga gipatuman gayod sa hingpit ang suspensiyon. Wala na lang niya komentaryohi ang pagkasuspenso sa mayor ug miawhag na lang sa iyang mga tigpaminaw nga atangan ang resulta sa padayon nga pagpangimbestigar sa Ombudsman. -- Sumpayan pa