Walay kamatayon ang gugma

Gula 68

“Nia ra ko sa Cebu, Day. May mahinungdanon lang kong giasikaso. Sultihi lang palihog si Mr. Beltran nga dili pa gihapon ko maka-report sa trabaho karon.”

“Pero ngano man, Day?”

“Basta lang. Masayod ka ra unya sa hinungdan.”

Nianang pagkahapon migawas si Jody sa hotel nga iyang giestaran. Nahutdan na siya’g kuwarta maong miadto siya sa labing duol nga bangko ug nag-withdraw sa iyang ATM.

Gikan sa bangko, misulod siya sa usa ka outlet sa Jollibee sa downtown area. Mikaon siya.

Sa naghinungatunga na siya sa pagkaon, nasigpatan niya sila Randy ug Megan nga misulod sa kan-anan. Wala lang tuyoa, gisakitan siyang nagtan-aw sa duha nga malipayong nagkuyog.

Mihinok siya’g gawas sa kan-anan samtang wala pa siya makita sa duha. Wala na niya tiwasa ang gi-order nga pagkaon. Dili siya buot nga makit-an nilang Randy ug Megan.

Mibalik siya sa hotel nga iyang gi-estaran. Ug sa sulod sa lawak nga iyang giokupahan, mihilak siya taman sa ginhawa. Gipahungaw niya ang tanang naghuot sa iyang dughan. -- Sumpayan pa