Walay dako nga makapuling

Kalit lang nga nagkaguliyang ang mga tawo diha sa sulod sa merkado sa among lungsod sa dihang dunay duha ka mga tawo ang nagginukdanay. Nagdala ra ba og hait kaayo nga pinuti ang usa kanila nga maoy naggukod sa nahauna.

Tungod sa akong kaikag midali kog iliot sa mabagang duot sa katawhan ug mipahimutang sa usa ka dapit diin makita ko kaayo ang mga nagginukdanay.

Daw dili ko makatuo sa akong nakita. Kay mao man gyuy misugat sa akong mga mata sila si Berto ug Doming nga maoy nagginukdanay. Si Berto maoy nag-una samtang ang nagsunod kaniya mao si Doming ang mangangayo og mga payong. Apan si Doming nagbitbit og usa ka mahait kaayong pinuti. Nga nagpaminti sa tumang kalagot nga naggukod kang Berto.

Wala man gud ko magtuo nga mao kadtoy mahitabo. Kinsa ba guy magdahom nga si Berto nga maoy giilang haring gangis sa among dapit ug giila sa iyang kaisog gukdon lang og usa ka taligatos nga mao si Doming. Si Doming nga usa ka tawo nga hilomon kaayo ug dili gayud palaaway. nga motingog lang gani og unahan mog sulti.

Kusog pa sa manatad nga nagdagan si Berto. Muna gyud niyag paninguha nga dili gayud maapsan ni Doming. Nga nagpaminting nagsunod niya. Tiaw mo bay kun maapsan siya siguro man gyud nga matabas ang iyang bukobuko sa mahait nga pinuti nga gibitbit ni Doming.

Mokalit man gani sa pagsiyagit ang mga tawo ilabi na kun hapit na gayud maapsi ni Doming si Berto. Mahiapil gani usahay kog siyagit. Kay si kinsa ba say dili kulbaan nga magtan-aw sa duha. Ilabi na kay isigi usab og panigbas ni Doming ang gibitbit niyang pinuti diha sa hangin. Ug may mga higayon gani nga mora na gyud og maigo na ang bukobuko ni Berto.

Samtang nagpadayon sa pagginukdanay ang duha nakaingon hinuon ko sa akong kaugalingon nga unsa ba diay ni si Berto puti man sab diay og itlog? Mobahag man sab diay ang ikog kun duna nay tawo nga mangurso sa pagsukol kaniya. Unta siya man maoy giilang haring gangis sa among dapit.

Ug ning higayona mora hinuon og nahanaw na ang akong pagbilib kang Berto. Mibelib man unta ko kang Berto tungod sa iyang kaisog. Nga hapit gani ang tanan mga kalakin-an sa among dapit mitahod man gayud kaniya. Ug miila sa iyang kahawod.

Apan ning higayona morag nabalhin na hinuon ang akong pagbelib ngadto kang Doming. Kay bisan tuod sa iyang kagamay nakahimo pa sa pagpadagan kang Berto ang giilang haring gangis sa among dapit. Ug gikahadlokan hapit sa tanan.

Sukad lang gud mi manimuyo ning maong lungsod nga maoy giisip nakong ikaduha namong puloy-anan naila ko na kaayo si Berto tungod sa kamaayo niyang laki sa nagkalainlaing matang sa away. Gani ubay-ubay na sa mga kalakin-an diha sa among dapit ang nakatilaw sa iyang mga kamot. Ilabi na sa iyang mga kumo. Maong gikahadlokan gayud siya sa kadaghanan. Ug giila man gani nga haring gangis sa among dapit. Ug hangtod na gani sa mga kanait nga mga barangay.

Apan tungod ning maong hitabo nga akong nasaksihan bag-ohay pa lang. Nausab ang akong pag-ila kang Berto. Morag dili nako kabelibon kaniya. Kay didto naman ako mobelib kang Doming. Nga bisan sa iyang kagamay nakapahimo pa sa pagpadagan kang Berto nga dako pa kaayo kaniya. (Kataposan)