Anino sa adlaw

Gula 50

Sa sinugdanan, nakugang ang iyang mga ginikanan sa iyang gitug-an. Mora’g naglisod sila pagdawat sa kamatuoran, labina nga nasayod sila nga ang amahan sa bata nga iyang gisabak usa ka rebelde nga gukdonon sa balaod.

“Nasayod na ba si Ronald ning imong kahimtang?” Pangutana sa iyang amahan.

“Wa pa,” laktod niyang tubag.

“Mao ni nakalisod ron. Unsa man kahay kaugmaon sa inyong anak kun magpabilin siya sa bukid, kun magpadayon siya sa pagrebelde sa kagamhanan?”

Wala na lang motingog si Teresa. Nasayod siya nga bisan unsa pay iyang ipangatarongan, wala gayod siya’y dag-anan sa iyang amahan kay siya’y nakasala.

Natinuod gayod ang pangagpas ni Teresa. Dihang nag-anam nag busyad ang iyang tiyan, gipahunong na siya sa iyang mga ginikanan sa pag-eskuyla.

Usa niana ka gabii, wala damha nga nahitungha si Ronald sa balay nila ni Teresa. Nahinangop pag-ayo si Teresa. Pero si Ronald nakugang pagkakita nga nagbusyad na ang iyang tiyan. Kapin na sa unom ka buwan ang iyang gisabak.

“Miadto ko sa imong boarding house,” ni Ronald pa. “Matud sa tag-iya sa balay, wala ka na kuno mopadayon og eskuyla maong mianhi na lang ko sa inyo.”

“Wa na ko makapadayon pag-eskuyla tungod niini,” gihapuhap ni Teresa ang iyang tiyan. “Nagbunga gyud ang atong gibuhat didto sa Banlas Inn.” -- Sumpayan pa