Walay kamatayon ang gugma

Gula 67

Naghalang ang iyang mga mata nianang pagkabuntag. Tungod tingali sa kakulang sa tulog ug sa pagpunay og hilak. Maglisod siya pagdawat sa nahitabo kaniya. Nahimong miserable ang iyang kinabuhi karon tungod sa iyang paghigugma sa usa ka lalaking walay baroganan.

Wala siya mo-report sa buhatan sa Silver Star Daily nianang adlawa. Nagmuok ra siya sa sulod sa lawak sa hotel nga iyang giokupahan. Wala usab siya manawag sa ilang buhatan aron unta pagpahibalo sa hinungdan kun nganong dili siya makatambong sa trabaho.

Lain ang pamatyag niya sa iyang lawas. Gipiog siya sa kaluya. Tibuok adlaw siyang naglublob sa iyang kuwarto sa hotel.

Pagkasunod adlaw nanawag na si Jody sa buhatan sa Silver Star Daily. Si Jasmine ang nakatubag sa iyang tawag.

“Naa ba si Mr. Beltran, Day?” Gipangutana niya si Jasmine.”

“Wa pa ra ba,” maoy tubag. “Nanawag man to siya kaganina, nagpasidaan nga unya nang palis siya mo-report.”

“Diay ba?”

“Hain man ka karon, Day? Nangita ra ba si Mr. Beltran nimo kagahapon kay wala ka man motungha sa trabaho.” -- Sumpayan pa