Ang manok ni Fredmon

Si Fredmon labihan kasugarol sa manok. Ubay-ubay ang iyang mga hiniktan. Pulos kini mga sinyalan. Suhito siya sa bulok sa manok nga angay'ng itari sa panahon sa bulang. Dagko ang kantidad nga iyang ipusta apan ang mga kontra ray mabulahan kay kanunay siyang mapilde.

"Pre, kaluoy baya nimo uy," nagkanayon si Rey, ang diyanitor sa simbahan usa niana ka Sabado sa hapon sa ilang panagkita. "Magpunay ka man la’g kapilde. Ambi, palaini kuno ang modos sa imong pagpanari. Sulayi kuno pag-ampo sa simbahan."

"Aw, oo tuod Pre 'no?" ni Fredmon pang mahinangpon. "Kay wa man gyod magsilbe ang mga tangil ug sinyal, gamiton ko na usab og pag-ampo. Ugma sa udto, kay Domingo man una ko moadto sa bulangan mohapit ko sa simbahan nga magdala sa akong manok."

Tuod man, nianang pagkaugma sa udto mihapit si Fredmon sa simbahan nga nagdala sa iyang manok. Mingaw kaayo ang simbahan kay wala na may misa. Miduol si Fredmon sa rebolto ni Jesukristo nga gilansang sa krus. Miluhod siya sa tiilan niini ug nag-ampo.

"Ginoo, kaloy-i intawon ako. Padag-a na intawon sa tari kining dala kong manok. Purdoy na intawon ako, Ginoo, kay magpunay lag kapilde. Intawon, Ginoo, kaloy-i na intawon ako."

"Sige, Fred, kaluy-on ko ikaw," tingog nga migilis sa kahilom nga naglimis sulod sa simbahan nga nakapauknol kang Fred. "Bughi pagpusta kanang dala mong manok kay ako nang padag-on. Sige, lakaw na kay atua na sa bulangan ang tanang mga puntos."

"Salamat intawon, Ginoo," tuaw nga mahinangpon ni Fredmon. Nanguros siya. Iya usab nga gikudsan ang iyang manok. Sa pagkatapos mitindog siya ug migakos sa mga tiil sa imahen ug unya mihalok taman sa ginhawa. Iya usab nga gipahalok ang iyang manok sa mga tuhod sa imahen dayong silit paglakaw paingon sa gawas. Sakto dagan siyang miadto sa merkado aron manghulam og dagkong kantidad sa iyang mga suking tigpangumpra sa iyang mga tawong, tamates ug mga utanon aron ipuno sa iyang giandam nga igpupusta. Mag-uuma kini si Fredmon kansang mga abot maoy gisaligan sa ilang panginabuhi.

Labihang hinangopa ni Fredmon sa lihok nga gipakita sa iyang manok didto sa bulangan. Labihan niini kaigmat nga nakigharong sa kaaway. Minunot kini pagsulbong sa kontra ug didto sa itaas girapido kini pag-ayo. Naigo kini sa iyang tari nga maoy nakapatagak niini sa yuta.

"Payit, Hennn!!!" abida ni Fredmon sa iyang manok. Hingpit ang iyang pagsalig nga modaog na siya kay gisaaran nga tabangan sa Ginoo nga i yang giampoan. Apan kalit siyang nahugno kay sa pagtugpa sa iyang manok gisugat siyag rapido sa bulang sa iyang kaaway. Mitaop ang bulang sa iyang dughan ug midulog kini pagligdas. Gipunit sa kuyme ang duha ka manok ug gipatusik. Ang kontra sa kang Fredmon luyang mitusik samtang ang kang Fredmon hinay nga milingiw. Giisa sa kuyme ang manok sa kontra ug gisangyaw nga maoy mananaog!

Labihang lagota ni Fredmon! Midali siya paggula sa bulangan ug nagdaling mipauli. Gikuha niini ang pinuti ug nagdagang miadto sa simbahan. Gidumdom niya ang dapit nga nahimutangan sa rebolto ni Jesukristo aron kini tigbason. Apan nahitalunong siya kay wala na man kini didto. Maoy miabiabi sa iyang mga mata ang gamay ug baratohon nga krusipiho.

"Dong, hain si Tatay mo?" singgaak ni Fredmon ngadto sa krusipiho. "Yatis, butboton siyang dako! Misaad siyang padag-on ang akong manok ug miingon pa nga pabughan pagpusta, apan diay..."

"Dili Dios ang mipasalig nimo, Pre!" tingog nga misagkaw kang Fredmon. "Ako kadtong misulti nga pabughan mog pusta ang imong manok kay modaog ka na! Ako kadtong gituyo aron mohunong ka na sa panugal. Ang sugal, Pre, wa gayoy hinungdan! Kay bisan tuod kun modaog ka dili tanan maimo. Kuhaan kinig dagko sa ariba ug ingon man sa mga tawong nagpaluyo niini. Sa pagtalikod mo kaganina gisundan ko ikaw sa merkado ug hangtod sa bulangan. Sa pagkapilde sa imong manok midali ko pagbalik sa simbahan ug giilisan kog krusipiho ang dakong rebolto ni Hesukristo agig panagana nga imong pahimungtan..."

"A, ikaw day 'to Pre?" ni Fredmon pang mibakyaw sa pinuti. Apan hangin ray natigbas ni Fredmon kay tulin pa sa manatad nga midagan si Rey. (Katapusan)