Anino sa adlaw

Pulos laway ang iyang gisuka. Mora’g mahabwa ang iyang tinai maong midigwa siya taman sa ginhawa. Nanggawas ang laway nga iyang gisuka sa iyang baba ug ilong. Naluya siya sa pagsinuka. Gipaningot siya’g bugnaw.

“Unsa bay nahitabo nimo, Teresa?” Wala makapugong pagpakisayod ang iyang ka-boardmate nga si Angeli.

“Wa ni kaso,” laktod niyang tubag. “Gipanuhot lang tingali ko.”

Mibalik siya’g sulod sa iyang kuwarto dihang medyo arang-arang na ang iyang pamatyag sa kaugalingon. Mihigda siya’g balik.

Samtang nagtutok ang iyang mga mata sa kisame, dihay misantop sa iyang hunahuna. Nahinumdom siya nga duha na diay ka bulan nga wala siya tunghaa sa iyang regla. Gikulbaan dayon siyang naghunahuna niini. Nabalaka siya nga tingalig nagbunga ang nahitabo tali kanila ni Ronald didto sa Banlas Inn.

Apan kausa ra kadtong nahitabo kanila. Wala na masubli ang nahitabo nila ni Ronald sa Banlas Inn. Talagsa ray babaye nga momabdos bisan sa usa lang ka sexual intercourse. Pero kun tinuod ang iyang katahap nga nagbunga ang gibuhat nila ni Ronald sulod sa mabugnaw’ng lawak, unsaon man niya pagpasabot ang iyang mga ginikanan mahitungod niini? Kini ang iyang gikabalak-an. -- Sumpayan pa