Manag-agaw nga ungo nagbugno

Panadtaran, San Fernando, Cebu Suod nga manag-agaw sila si Rencio ug Ramil. Ang ilang mga ginikanan nga sila si Kardo-Ramona ug Kolas-Benigna dili kaayo suod sama niining duruha ka mga manag-agaw. Bisan pa kaniadto sa nagtungha pa sila sa Elementarya sila gyud ang magkuyog.

Unya, dihay tuig nga nadungog nga ang ilang mga ginikanan nahimo kunong mga mangtas nga ungo ug dunay nakakita nga nangabat didto sa kalubihan ni Mr. Paterno, ang ilado kaayong boxing promoter didto sa siyudad. Matag Sabado ug Domingo makita gyud ang kotse ni Mr. Paterno nga mag-parking sa iyang rest house ilawom sa kalubihan.

Ug sa atbang niining kalubihan ni Mr. Paterno mao ang dakong luna nga maoy nahimong puwesto sa tabo nga matag Sabado ug Domingo ra mahitabo. Daghan kaayong mga baligya dinhi sa tabo.

Dunay daghang mga ukay-ukay, dunay karenderya, dunay tari, ug duna usay balibol diin ang mga batan-on ug dili batan-on magpustaanay sa ilang pagduwa. Ug dinhi usab nila iplastado ni Ramil ug Rencio ang ilang negosyo.

Nagmatada man gud sila og mga baboy ug mga kanding ug daghan na sila’g mga suki. Bisag duna nay tabitabi bahin sa ilang mga ginikanan apan wala motuo ang mga lumolupyo kay wala pa may giabat nga gibalbal gyud. Ug mao na kini ang ilang negosyo ug duna pud silay mga sinuholan nga maoy moihaw ug maoy motadtad sa mga karne.

“Kun mawala na kining tabo dinhi, Gaw Ramil, asa man ta mamalhin?” nangutana si Rencio, kay nadunggan man gud nila nga dili na gusto si Mr. Paterno nga anha sa dakong wanang sa atbang ipahimutang ang tabo, kay ang maong yuta siya maoy tag-iya busa makabuot siya kun dili na siya gusto nga anha iplastada ang dakong tabo, taudtaod na kini ug gihasol na si Mr. Paterno nga maminaw sa suliyaw sa mga tawo kanang magsugod na ang tigbakay. Apan hangtod karong mga bulana wala pa gyud balhina ang tabo.

Unya, usa ka adlaw may gidala nga usa ka balde nga karne si Rencio ug iyang gibutang sa may ilawom sa lamesa. Ug may gisulti siya ni Ramil, iyang gihunghong sa pagsulti.

“Lahi na nga matang sa karne, Gaw, Ramil. Anha lang na diha sa ilawom, kay duna koy hatagan ana,” ni Rencio pa.

Igo lang miyango si Ramil. Ug kay kusog kaayo ang pinalitay sa ilang mga karne, nakalimot si Ramil ug naapil niya pagbaligya kadtong gilain nga mga karne sulod sa balde nga gibutang ilawom sa lamesa. Pagbalik ni Rencio miulbo ang kasuko niini pagkahibawo nga naapil pagbaligya ang gilain nga karne.

“Buanga nimo, Gaw, uy. Wa ka kahibawo nga kadtong mga karneha, mga karne to sa kuan,” unya iyang gihunghong.

“Unya, imo kong pakasad-on na, Gaw!” Misinghag si Ramil.

“Kinsa man diay, di ba ikaw man ang akong gibinlan!” Mibawos pud pagsinghag si Rencio. “Wa ka mahibawo, Gaw, nga kun makaun na to sa mga taga dinhi sa ato, silang tanan mamahimong mga ungo, mangatakdan sila!”

“Problema na na nimo, nganong imo mang gidala dinhi tong mga karneha, nga mga karneng baboy ug kanding man ning atong giplastada dinhi sa tabo, di naapil hinuon tog baligya...!” Mitindog si Ramil nga pula na kaayo ang mga mata. Dinhi, misamot na gyud ang kainit sa duruha, ug kalit lang nga nagsumbagay ang manag-agaw ug tungod sa nahimong kasaba, nagdinaganay ang mga tawo ug ingon man ang mga naninda sa may kilidkilid nga bahin sa taboan. Dugay ang kombati sa duha ka mag-agaw ug nakadani kini sa pagtagad ni Mr. Paterno nga miduol nga nagdalag ripli.

“Hoy, unsa man di mo patuo, ha?” gi-cock ni Mr. Paterno ang ripli apan kalit siyang nahasibog kay siya man ang giatubang sa manag-agaw nga karon nanag-as na ang mga bangkil, kuko, ug mga buhok.

“Ikaw ang among, patyonnnn, hilabtanon kaaaa, haaa wakkkk! Wakkkk!” mihamag ang duha ka mangtas nga ungo kang Mr. Paterno kinsa nakapabuto na sa iyang ripli. (Katapusan)