Walay kamatayon ang gugma

Gula 62

Misaylo ang awto sa iyang nahimutangan. Iyang nasuta nga ang awto ni Megan maoy miagi sa iyang tungod. May kaugalingong awto si Megan nga pinalit sa ilang daddy. Palitan man gani usab unta siya niini og sakyanan apan mibalibad siya. Hadlokan siyang magmaneho. Mas komportable siya kun mag-commute kay sa magmaneho sa kaugalingong sakyanan.

Nakasukot si Jody sa iyang kaugalingon kun asa mopaingon si Megan? Nganong mibiya man kini sa ilang pinuy-anan niining halawom na nga kagabhion? Nasayod kaha ang ilang amahan niining paglakaw sa iyang manghod? Milakaw kaha si Megan aron pag-agpas ug pagpangita kaniya?

Gipugos pagwakli ni Jody sa iyang hunahuna ang ulahing pangutana nga iyang gisukna sa iyang kaugalingon. Dili mahitabo nga mangita si Megan kaniya. Nalipay gani hinuon kini nga gihinginlan na siya sa ilang amahan. Nasayod si Jody nga sukad pa kaniadto, buot ni Megan nga soluhon ang pagmahal sa ilang amahan kanilang mga anak.

Milungtad gayod og trayenta minutos ang pagbunok sa ulan. Dihang mituang na, mipadayon siya paglakaw. Kamig na kaayo ang kabugnaw sa kagabhion ilabi na nga bag-ohay lang nag-ulan. -- Sumpayan pa