Anino sa adlaw

Gula 44

“Imbes nga buhion ang anti-subversion law,” laing pangutana ang gipasupot ni Ricky Liwanag. “Unsa gyud ang mas praktikal nga angay buhaton sa gobyerno?”

“Angayang sulbaron una sa gobyerno ang nagpadayong extra-judicial killings ug media killings sa nasud kaysa mohimo’g laing lakang nga walay laing tuyo kundili ang paggukod niadtong mosaway sa naghitak nga kurapsiyon,” matud sa SecGen.

Sa bukid nga gikampohan sa mga rebelde, nagpadayon sa ilang naandang kalihokan ang mga sakop sa walhong grupo nga gipangulohan ni Kumander Abay. Gisugdan na nila ang gihingusgan nilang plano sa pagpalig-on sa ilang pundok.

Gihingusgan nila ang pagpangolekta og revolutionary tax. Nagtuo sila nga usa kini sa makatabang aron mapalig-on pagbalik ang ilang pundok. Pero diyotay ray nisanong sa gipangayo nilang revolutionary tax. Daghang mga opisyal sa kalungsoran ug kabarangayan nga wala na mohatag sa ilang gipangayo.

Niini, nahisagmuyo si Kumander Abay. Ingon sa nakombinser gayod sa gobyerno ang katawhan sa dili paghatag og bisan unsa ngadto nila nga naglihok sa kabukiran. Sa hilom, nabalaka si Kumander Abay. Kun magpadayon ang ingon niini, makapahuyang gayod kini sa ilang kalihokan ug hayan mapakyas ang ilang kawsa. -- Sumpayan pa