Ang Diyos ug ang barbero

"Kining atong gobyerno, Bay," matod sa barbero samtang iyang gitupihan si Agaton, "wa na gyud ni paglaum nga moayo."

"Ngano man Bay, nga wa na may paglaum nga moayo ang atong gobyerno?"

"Ang corruption sa atong gobyerno, Bay, di na matabang. Ang kalisud karon sa panginabuhi nga ang uban dili na makakaon og katulo sa usa ka adlaw. Pun-an pa sa mga sakit nga mikaylap ug walay mga tambal, ug kun aduna man, walay ikapalit, busa mga politiko lang ang nabulahan dinhi sa ato."

"Aw, kana hinuon, Bay," mitubag si Agaton, ''ato na lang nang ihangad sa Diyos."

"Wa na ko motuo og Diyos, Bay," matud sa barbero, "kay kun tinuod pang may Diyos, nganong daghan mang tawong nagutom kay walay makuhang trabaho, busa ang uban mangawat na lang. Ang mga pobre intawon nga masakit pasagdan nalang mangamatay kay way ipalit og tambal."

Nahimut-okan si Agaton ug wala dayon siya makatubag. Hisigpatan niya ang usa ka tawo nga naglago ug way kaligo ug tag-as kaayo ang buhok nga nagka-gubot lang sama sa gibalayan sa lawalawa.

"Kun wala ka motuo nga may Diyos, ako usab wala motuo nga may barbero."

Mingisi ang barbero. "Nganong nakaingon ka man niana nga nia man ko nga nagtupi nimo."

"Kun tinuod nga may barbero, ngano man nang tawo naa's daplin sa kalsada, naglago lang, tag-as kaayo og buhok, wa may motupi niya?"

"Nia lang ming mga barbero sa daplin, maong mitag-as nang ilang buhok kay wa man sila moduol namo aron magpatupi."

"Mao na ang gusto kong ipatin-aw nimo," matud ni Agaton, "nga ang Diyos, ania ra sa duol apan wala lang moduol ug mangayo og pakitabang ang ubang tawo sa ilang mga problema."

"Busa, duna gyud diay Diyos," miuyon ang barbero. (Katapusan)