Way ayo nga relasyon

Cangyan, Carmen, Cebu

Hi! sa babaye nga akong katupad sa ayroplano. Tam-is iyang pahiyom. Hapit na mo-take off ang ayroplano. "Hello" nako pa. Nipahiyom sab niya. "Dili gyud diay ko ilhan nga bayot" tuaw nako sa hilom samtang naghugot sa akong seat belt.

Wa man sab god ko magbinabaye og lihok o sinina. Pormal man ko manglihoklihok. Gani, matud pa ni Manoy Allan akong bugtong maguwang (duha ra man ming magsoon), may charm kono ko o sex appeal. Kaibgan gyud kono ko sa mga babaye. Hasta sab ang mga bayot. Maibog sab kono nako.

Husto siya. Kay ang akong best friend nga kababata gikan sa elementarya hangtud sa hayskul nga si Norelyn Rosaldo, nihilak. Sa pagsulti nako niya nga bayot ko. May tinagoan diay siyang pagbati ngari nako. Apan wa koy mahimo. Babaye man ang akong kasingkasing.

Daghan nang mga higayon nga nasinati nako ug namatikdan nga di gyud ko mailhan nga bayot. Lalaking lalaki gyud kono ko. Macho pa. Sa akong gitrabahoan nga kompanya sa Saudi, pero mi lalaki sa among quarters. May kauban ko nga bayot nga si Ritche. Magsige siya’g tsansing nako. Wa man god ko magsaba nga bayot ko. Sa duha ka tuig nakong serbisyo sa Saudi, nahuman gyud akong kontrata. Makabakasyon na ko. Accounting Clerk ko sa Babylon Department Store nga diha gyud sa kinapusoran sa siyudad.

Gihinuktokan nako ang mga tambag ni Manoy Allan.

"40 na imong edad. Ulitawo gihapon. Inig ka tiguwang nimo, kinsa may moatiman nimo? Di ka kasalig sa imong mga pag-umangkon. Duha ray akong mga anak. Puro lalaki. Mga bugoy. Maayo gyud nang maminyo ka. Manganak. Aron dunay gabay nimo sa imong katiguwangon. Patay na atong mga ginikanan. Pero wa silay ikamahay nato. Kay nakaatiman man gyud ta nila sa ilang pagluyaluya." Gipaminaw ko lang siya. Wa nako supaka. Wa ko nakiglalis. Kay di ko gustong mag-away mi.

Sa mga kasakay nako sa ayroplano sa nangaging mga biyahe nako, duna gyuy pipila ka babaye nga ma-crush nako. Pagpadulong nako sa Saudi may kasakay nakong babaye nga nakig-ila-ila gyud nako. Nangayo sa akong address ug telephone number. Sigeng pangimbitar og dinner. Apan wa gyud koy interes.

Sa dihang nangaon mig snacks ni Manoy Allan sa restawran sa Mactan Airport, duna sab siya'y namatikdan nga babayeng costumer sa laing lamesa. Sige konog tan-aw nako. Samtang ako, sigeg panan-aw og lalaki.

Karon, ang akong katupad nagsigeg lingi ngari nako. Mopahiyom. Gusto gyud makighinabi. Guwapa ra ba.

"Pagminyo na, Efren! Higayon na nga gamiton nimo imong lawas sa husto nga katuyoan sa paglalang nimo sa Ginoo. Sa imong pangidaron karon ug sa mga kasinatian nimo sa pagpakigrelasyon og mga lalaki, nakaamgo na gyud ka nga way pahikap nimong lalaki kun wa kay kuwarta. Panguwartahon ka lang. Kun wa ka nay kuwarta, di ka na tagdon. Way ayo nang matanga sa relasyon," ni Manoy Allan sa usa sa mga sermon niya.

Gidawat man niya akong pagkatawo. Girespeto. Di siya manapat nako. Mangasaba lang kun sobra na ka binastos akong nabuhat.

"Tawo ka. Dili mananap. May kaalam. Busa makapamili ka kun unsang matanga sa kinabuhi imong puy-an. Kana bang kalipay nga lumalabay. O kalipay nga molungtad." Kining mga pulonga ni Manoy Allan maoy di gyud nako malimtan. Nipilit sa akong alimpatakan.

Nakasabot ko ni Manoy Allan. Karon pa nako nasabti ang kabililhon sa iyang mga tambag. Ug nakahukom na ko. Dili ko siya pakyason. Bag-ohon ko na akong pagkatawo.

Gilingi ko akong tupad sa too. Wa ko'y tupad sa wala kay window seat man akong gipili. Gipahiyoman nako akong katupad. Nakahukom ko nga makighigala niya. Kuhaon nako iyang ngalan, addres ug numero sa selpon ug landline nga telepono. Magpakalaki na ko. (Kataposan)