Walay kamatayon ang gugma

Gula 56

“Tungod kay anak siya sa higpit kong karibal sa negosyo.”

“U-unsa?”

“Nagsuhol ko’g tawo nga mo-background check kaniya. Nasayran sa akong gisuholan nga anak diay siya sa unang asawa ni Teofisto Maglana ang orihinal nga tag-iya sa Mozart Publications nga ako karong gipanag-iya.”

Wala makatingog si Jody. Wala siya magdahom sa kasayoran nga moabot kaniya niining higayona.

“Nagtuo ko nga may daotang tumong si Randy sa atong pamilya,” nagkanayon si Mr. Garcia. “Nahinumdom ko sa bahad ni Teofisto Maglana nga buhaton niya ang tanan aron mabawi niya gikan kanako ang iyang patigayon nga ako na karong gipanag-iya. Ug posible nga si Randy ang iyang gigamit nga kasangkapan aron pagtuman sa iyang laraw. Ug si Randy migamit sab kanimo.”

“N-nasayop tingali ka, Dad,” ni Jody nga misulay pagpanalipod sa iyang hinigugma. “Sa gikaingon ko na, buotan si Randy. Tinud-anay ang iyang paghigugma kanako. Ug managsama kaming nahigugma sa usa’g-usa.”

“Buotan?” Sikmat ni Mr. Garcia. “Wa ka ba makamatikod kun unsa ka-bad influence kadtong maong lalaki nganha kanimo? Gitudloan ka niya sa pagsupak sa akong kabubut-on. Unya moingon ka nga buotan siyang pagka lalaki?” -- Sumpayan pa