Anino sa adlaw

Gula 38

Wala motingog si Kumander Abay. Ingon sa wala kini gusto mahitungod sa giplano ni Ronald. Daw wala kini makauyon sa buot niyang buhaton.

“Gikasulti ba nila si Manoy Ricky?” Gipangutana ni Ronald ang Kumander.

“Nakahigayon si Ka Martin sa pagpakigsulti sa imong maguwang,” matud ni Kumander Abay. “Nag-ingon ang imong maguwang nga pakalmahon ka lang. Nagtuo siya nga may kalabotan sa iyang trabaho sa media ang kamatayon sa inyong mga ginikanan.”

“Kun mao kana, ang mga abusado gihapon sa katilingban maoy responsable sa ilang kamatayon. Magbayad sila’g mahal sa ilang gibuhat.”

“Magkagrabe gyud ang hustisya sa patag kun dili mapitol ang mga abusado ug mapahimuslanon sa nahuptan nilang gahom, Ka Ronald.”

“Kumander, mohangyo ko nimo,” mipalain si Ronald.

“Unsa kana?” Pakisayod ni Kumander Abay.

“Tugoti kong makalugsong sa patag kun ilubong na ang akong mga ginikanan. Gusto kong makakita bisan na lang sa ilang mga lungon. Di lang ko magpakita sa mga tawo nga mohatod kanila sa sementeryo. Magtago lang kong daan didto sa sam-ang.”

“Mosugot ko. Pero pakuyogan ko ikaw nila ni Ka Henry. Dili maayong mag-inusara ka. Mas maayo nga maneguro ta.” -- Sumpayan pa