Ang silahis

Gula 5

Human sa kapin sa oras nga pagpahuway gikan sa grabeng kumbati, parehong nahigmata sila si Jack ug Kerby.

“Kerby ayaw ipanabi sa uban ang nahitabo kanato. Adto unya sa opisina karong hapon kay asikasuhon nako ang imong application aron kapirmahan kini sa general manager,” matud ni Jack nga maoy mibuak sa kahilom.

Igo lang mitangdo si Kerby nga misul-ob dayon sa iyang brep ug pantalon. Misunod usab si Jack pagsul-ob sa iyang sapot. Bisan og kaadlawon pa, nananghid na si Jack kang Kerby nga mopauli.

Samtang nagsakay na si Jack og taksi paingon sa iyang gipuy-an, gisuwayan niya og kontak ang cellphone ni Fe Marie. Nalipay si Jack kay mi-ring na ang cellphone sa iyang hinigugma.

Apan nasagmuyo si Jack kay gikansel ang iyang tawag. Nagpasabot nga walay gusto si Fe Marie nga makig-estorya kaniya.

“Sori kaayo Fem nga wala ko makatunga sa atong sabot nga mag-night swimming. I will explain it to you kun ngano, pwede?” gipadad-an ni Jack og text message si Fe Marie.

Wala g’yud siya’y nadawat nga reply gikan sa hinigugma. Mga alas singko sa kaadlawon na nga nahiabot si Jack sa iyang boarding house. Tungod sa kalapoy ug kabangog pa sa alak nga ilang nainom ni Kerby, nakatulog si Jack.

Alas dies sa buntag na nga nakamata si Jack. Gikuha dayon niya ang iyang cellphone aron pahibaw-on ang opisina nga dili siya makatunga sa trabaho kay dili maayo ang pamati sa iyang panglawas.

Apan nakita ni Jack nga dunay duha ka unread messages. Gikan kini sa iyang hinigugma nga si Fe Marie.

“Nahiubos g’yud ko nimo Jack kay wala ka motuman sa atong gikasabotan.” Nasagmuyo si Jack kay nasayod siya sa iyang nahimong sayop, apan misamot nga wala siya mahimutang human niya mabasa ang ikaduhang message. “Break na lang ta.” Gikontak dayon ni Jack si Fe Marie pinaagi sa iyang cellphone, apan dili kini makontak.

Nagdali si Jack nga misulod sa banyo aron maligo kay gusto niya nga adtoon dayon si Fe Marie sa iyang boarding house.

Pag-abot ni Jack sa gipuy-an sa hinigugma, wala didto si Fe Marie. Gitug-anan siya sa kauban niini nga si Fe Marie nag-ilis na diay og numero.

“Palihug ikontak ko niya Glenna aron akong mahibaw-an kun hain siya karon,” gihangyo ni Jack ang board mate ni Fem.

Taud-taud, mi-reply si Fe Marie kang Glenna. “Dia ko karon sa SM friend. May gipalit ko kay mopauli ko sa probinsya unyang hapon. Nakig-break na ko ni Jack.” (Sumpayan pa)