Anino sa adlaw

Gula 37

“Nasayod ko sa imong gibati karon, Ka Ronald. Pero di sab mi makatugot nga mag-ungaw sa kakuyaw ang imong kinabuhi.”

Wala motingog si Ronald. Napahit niya ang iyang wait. Kun masayran lang niya kun kinsay responsable sa kamatayon sa iyang mga ginikanan, pahamtangan gayod niya kini sa bangis niyang panimalos. Pabayron niya’g mahal ang mga makasasala.

“Ayaw kabalaka,” matud ni Kumander Abay. “Karon dayon magsugo ko’g tulo sa atong mga kauban paglugsong sa patag aron maniid.”

“Mas maayo hinuon kun mao kana,” ni Ronald pa. “Kun mahimo, labing maayo nga ikasulti nila si Manoy Ricky.”

“Kun way kuydawo,” sa Kumander pa, “mao kanay ipabuhat ko kanila.”

Tuod man, nagpadala gilayon si Kumander Abay og tulo sa iyang mga sakop ngadto sa patag aron pagsusi kun unsay sitwasyon sa dapit nila ni Ronald. Wala pay tungang gabii, nahibalik na sa kampo sa mga rebelde ang mga sinugo sa kumander. Gisuginlan dayon ni Kumander Abay si Ronald sa resulta sa lakaw sa iyang mga sinugo.

“Kuyaw gyud ang sitwasyon, Ka Ronald,” sa kumander pa. “Adunay mga army nga magbahas-bahas kanunay sa inyong dapit. Ang uban magpaduol gyud sa inyong balay. Delikado gyud kun mopakita ka didto sa haya sa imong mga ginikanan.”

“Pero kinahanglang makatambong ko sa paglubong unya nila, Kumander.” -- Sumpayan pa