Walay kamatayon ang gugma

Gula 53

Wala motingog si Jody. Ingon sa milapos sa pikas niyang dalunggan ang gipamulong ni Randy. Naglatagaw ang iyang hunahuna. Kalit siyang nawala sa iyang kaugalingon.

“Nia na ta,” gikuhit si Jody ni Randy sa pag-urong sa ilang gisakyan sa tungod sa gate nga puthaw sa usa ka luho nga panimalay.

Naalimatmatan si Jody. Mao pa siya makaamgo nga taudtaod diay siyang nahiunlod sa halawom nga paghinuktok. Wala gani siya makadiparal nga nahiabot na diay sila.

“Nagmingaw na man ang inyong balay,” ni Randy pa. “Nangatulog na tingali sila. Wa nay suga nga nagsiga sa sulod. Ang suga sa lagwerta na lang maoy nagsiga.”

“Sige lang,” ni Jody. “May kaugalingon man kong yawe sa pultahan.”

Giablihan ni Jody ang pultahan sa walang kilid sa awto. Dihang mihana na siya pagkanaog, gigunitan ni Randy ang iyang walang abaga.

“Nga-ngano?” Gilingi niya ang ulitawo.

“Kun unsay mahitabo,” matud ni Randy. “Sultihi dayon ko.”

“Okey.”

Nanaog siya sa sakyanan ni Randy. Gidulong ang gate ug giablihan kini ginamit ang dala niyang yawe. Dihang nakasulod na siya sa gate, milingi siya ngadto ni Randy nga nagpabilin sa sulod sa sakyanan. Iya kining gikawayan. Mipabusina si Randy agi’g sanong sa iyang pagkaway. -- Sumpayan pa