Ang silahis

Gula 2

Nalingaw kaayo si Jack sa gitambongan niya nga birthday party ni Kerby, ilabi na nga ang batan-ong engineer wala gayud mobuwag kaniya sa pag-abi-abi.

Misipsip g’yud pag-ayo si Kerby kang Jack ilabi na nga gipasaligan siya niini nga tabangan aron madawat sa giaplayan niya nga trabaho sa kompaniya.

Giubanan ni Jack og pakig-inom si Kerby. Nag-videoke sila ug maoy nakapasamot nga nakalimtan ni Jack ang sabot nila ni Fe Marie nga mag-night swimming. Wala na gani siya makabantay sa nagpusot-pusot nga text messages ug tawag ni Fe Marie sa iyang cellphone tungod sa kasaba sa pagsige nila’g kanta sa videoke.

Alas dies na sa gabii dihang nakahinumdom si Jack sa ilang sabot ni Fe Marie nga mag-night swimming. Miadto siya sa mingaw nga dapit ug gisuwayan pagkontak ang iyang hinigugma, apan wala na g’yuy mitubag. Sigurado si Jack nga nasuko na kaniya si Fe Marie. Nakahuna-huna siya nga bakakan niya ang hinigugma.

“Sorry Fem, nahabilin sa office ang akong cell ganina kay gidala ko sa among general manager ug emergency conference uban sa among Japanese contacts.” Wala gyu’y tubag nga nadawat si Jack gikan ni Fe Marie. Nahukman ni Jack nga mopadayon na lang sa iyang pag-enjoy didto sa birthday party ni Kerby. Daw suod na kaayo sila si Kerby kang Jack.

Nasabtan ni Kerby nga si Jack makatabang kaayo kaniya nga madawat sa trabaho kay executive assistant kini sa general manager.

Lapas na ang tungang gabii, namauli na ang ubang bisita ni Kerby. Mora’g lipong-lipong g’yud si Jack sa daghan niyang nainom. “Anhi na lang ta mamahuway sa balay sir Jack, duna may guest room kining among balay,” tanyag ni Kerby.

Daw hilom nga nagyapa-yapa sa kalipay ang dughan ni Jack nga nakadungog sa tanyag ni Kerby. “Okay no problem, sige mag-inom pa kita isip selebrasyon sa bag-o mo nga trabaho sa kompaniya. Sigurado ka nga madawat, ako ra’y bahala Kerby.”

Hapit na alas dos sa kaadlawon nga nangundang sila pag-inom ug gihatud na ni Kerby si Jack sa guest room. Pareho sila nga nagsusapinday.

“Dinhi na lang ta higda Jack. Total paigo man kanato kining kama kay double man ni,” daw nagkanguhal na hapit si Kerby sa iyang sinultihan. Wala magduha-duha si Kerby pagtangdo kay alang niya gusto siyang makigsuod ni Jack. Dali ra sila nga nakatulog, apan mga alas kwatro sa kaadlawon, gidamgo ni Jack si Kerby. Sa iyang damgo usa siya ka lalaki nga nahigugma og sama kaniya nga lalaki.

Sa damgo ni Jack, iyang gigakos pag-ayo si Kerby. Natinuod ang iyang damgo kay ang iyang mga kamot nagpanghiram na sa kalawasan ni Kerby nga iyang gikadulog samtang sila pulos bangog sa alak. (Sumpayan)