Ang silahis

Lima ka tuig na nga steady sila si Jack ug Fe Marie. First love ni Jack si Fe Marie ingon man si Fe Marie, una pa usab niya nga hinigugma si Jack.

Kaklase sila si Jack ug Fe Marie gikan sa second year sa usa ka universidad dinhi sa dakbayan sa Sugbo dihang mikuha sila sa kurso nga engineering. 

Nagkasabot si Fe Marie ug Jack nga mag-night swimming isip kabahin sa pagsaulog nila sa ilang anniversary.

“Don’t be late sa atong date ha?,” gipahinumdoman ni Fe Marie ang hinigugma pinaagi sa text message.

“Okay,” mubo nga tubag ni Jack kang Fe Marie kay hilabihan niya ka busy sa pag-interview sa mga aplikante sa ilang kompaniya. Usa siya sa gitahasan nga mo-interview sa mga applicants.

Didto niya mahimamat si Kerby, bag-ong nahimong engineer nga apil sa miaplay og trabaho sa ilang kompaniya.

Wala makasabot si Jack sa iyang gibati dihang nakita niya si Kerby. Gaan kaayo ang iyang buot sa maong aplikante ug wala siya’y hunong sa pagtutok niini sa iyang panagway.

“Gusto ka ba g’yud nga motrabaho dinhi sa among kompaniya kay tabangan ko ikaw nga madawat sa trabaho,” giingnan ni Jack si Kerby nga wala kapugong sa pagpahiyom.

Misamot ang kaambongan sa panagway ni Kerby dihang mipahiyom siya ngadto sa nag-interview kaniya.

Lahi sa ubang mga aplikante nga gidispatsar lang dayon ni Jack, apan si Kerby gihatagan niya og taas nga panahon ang pakighinabi. Gitunolan pa niya og calling card si Kerby.

“Ayaw kataha pagkontak nako kun duna kay problema Kerby,” matud ni Jack.

Wala gayud makasabot si Jack sa iyang gibati pagkakita ni Kerby. Dili siya usa ka bayot apan mora’g may pagbati siya ngadto sa susama kaniya nga batan-ong engineer.

Naputol ang iyang paghinuktok dihang giduol siya sa iyang secretary. “Sir mibalik kadtong batan-ong engineer nga bag-ohay lang nimo gi-interview, may mahinungdanon kuno siyang tuyo nimo.”

Nagpahiyom si Kerby nga miduol sa lamesa ni Jack. “Sir, pwede ba og ma-invite tika karong gabii, akong birthday karon ug dunay giandam nga salo-salo ang akong mga ginikanan.”

“Sure, why not,” wala g’yud magduha-duha si Jack pagtangdo sa pagdapit kaniya ni Kerby. Sanglit hapon na man, gihuwat na lang ni Kerby si Jack ug nagkuyog sila pagpanglakaw.

Naghingapin ang kalipay ni Jack nga nakauban niya si Kerby. Daw nakalimtan na lang gani niya nga nagsabot sila nga mag-night swimming og si Fe Marie. (Sumpayan pa)