Walay kamatayon ang gugma

CEBU, Philippines - “A-ayaw...” Misulay si Jody sa pagpugong sa dihang iyang namatikdan nga buot nang kutloon ni Randy ang gihay sa iyang kaputli.

“Ayaw kahadlok,” hagawhaw ang pang-alam-alam ni Randy kaniya. “Andam kong manubag kun unsay mahitabo karon. Dili ko ikaw pasagdan.”

“P-pero, Randy...”

“Gimahal ko nimo, dili ba?”

Wala siya motingog.

“Pasagdi ko, Jody,” ni Randy pa. “Imatuod ko kanimo karon ang kadako sa akong gugma.”

May nahitabo gayod tali kanila. Milampos gayod si Randy sa pagkutlo sa kaputli ni Jody. Namatud-an sa dalaga nga sakit diay ang unang pagkatkat sa hagdanan sa ikapitong langit.

Human sa makutas nilang kombate sa kama, nanihapon sila. Miyamar na ang ilang tiyan sa kagutom.

Giareglar ni Jody ang iyang kaugalingon human makakaon. Nagdali-dali siya’g ilis. Manggawas na sila sa hotel aron makapauli na siya.

“Ihatod tikaw sa inyo,” ni Randy pa dihang didto na sila sa nahimutangan sa sakyanan sa ulitawo sa may parking area. -- Sumpayan pa