Ang relo

CEBU, Philippines - Giapas ko si Tiya Puring, inahan ni Noy Willy, kinsa maoy giestaran ko sa Riverside, Banawa, sa madyongan nilang Nang Lydia kay manihapon na. Apan nagdula pa gihapon kini sa akong pag-abot ug dakudako na’g pilde. Maglisod pag-undang bisag giunsa ko siya sa pagkuhit. "Nakakaon na mi, Dong." Niya pa nga mihinol sa petsas. Diay, gilibre sila ni Nang Lydia, ang tag-iya sa madyongan.

Wala koy nahimo. Mipauli na lang. Apan naunsa ba, nga pagka ugma gipasanginlan man ko sa bana ni Nang Lydia nga gikawat kuno nako ang iyang mahalong relo. Haskang sukoang Tiya Puring. Iya kong gidepensa’ag maayo. Hibawo man god si Tiya, unsa ang kalidad sa akong pagkatawo. Kang kinsa ug diin akong punoana gibunga. Nga bisag pobre mi, gikahadlokan gyod namo ang pagsupak sa mga sugo sa atong Ginoo. Labi na ang pagpangawat. Matang sa kinaiya, kang kansang balor, labaw pa sa bulawan.

Ang inahan ni Nang Lydia ug Tiya Puring magsuon. Si Tiya, nakabana’g porman. Samtang si Nang Lydia naminyo’g negosyante. Mao nga arang-arang ang kahimtang sa naulahi. Ako nga anak la’g kabos, ubos sa kaayo sa ilang pagtan-aw.

"Kay walay nahot, manghilabot gyod." Mao ni hunahuna sa bana ni Nang Lydia. Pasangil nga wala ikahimuot ni Tiya Puring. Pasangil nga nakaguba dili lang sa akong dughan. Kun dili, lakip na sa malinis kong reputasyon.

Walay aso nga makumkom. Bisag giunsag sablig og lapok sa magtiayong Lydia-Randolph ang akong pagkainosente, milutaw gyod ang matuod kong kalinis. Ilang nasayran nga ang nagkawat sa relo ni Randolph, ang ila ra diay'ng drayber nga miresayin. Ug ang alahas didto na nila makit-i sa ahensiya.

Dugay na kaayo kining hitaboa. Apan hangtod karon, wala gyod ko mahinumdom nga nakasultig 'sorry' ang magtiayon ngadto sa tawo nga ilang napasanginlan. Hinuon, akong himatikdan, nga morag suwawan sila nako sa higayon nga magkatagbo kami sa dalan. Hasta kapila na namo sila imbitara pag-ari sa amoa. Igo ming tanduon. Di gyod motunga. Ngano kaha? (Katapusan)