Ang lungon nga walay patay'ng lawas

Gitagalan na'g napu ka adlaw ang kinabuhi ni Lola Dagwa sa usa ka doktor nga espesyalista tungod sa sakit nga way kaayohan human magpakonsulta sa kanunay'ng kaluya sa iyang lawas, malipong ug unya matumba.

Inay kahadlok ang iyang bation nga sa dili madugay bawian na sa iyang hinuwaman nga kinabuhi sa makagagahum, kaisog karon ang iyang gibati.

Tungod sa iyang pangisog miorder siya'g usa ka mahalon nga lungon sa usa ka punerarya apil na niini ang mga suga, kandila ug mga ekipo para sa usa ka haya ug gipadeliber kini niya sa ilang balay. Nagpaorder usab siya'g mga buwak nga mahalon ug humot sa usa ka flower shop para sa iyang haya.

Nasiga ang mga mata sa iyang mga silingan nga nakakita sa iyang balay nga naa nay lungon ug mga suga, mga bulak pod. Aduna say mga tent sa gawas, lamesa ug mga siya nga gipahimutang sa tugkaran.

Wala madugay misunod usab pagduol ang mga silingan aron pagdungaw sa lungon apan misiga ilang mga mata kay wala man kini sud nga patay'ng lawas. Hilom silang minglingkod sa mga siya ug naghinunghungay sa ilang nakita, puno sa katingala ang ilang mga panagway.

Adunay miabot nga pari. Nakita nila si Lola Dagwa nga miduol, nagsul-ob na kini sa panghaya nga sapot. Huma’g estorya nila sa Pari nangabot ang mga anak ni Lola Dagwa sakay sa tagsa nila ka awto, miduol sa ilang inahan ug miamen.

Miatubang si Lola Dagwa sa lungon ug gialsa siya sa duha ka tawo padung sud sa lungon ug gisugdan na sa Pari ang pagmesa pinaagi sa pag-awit ug "Pahulay nga dayon".

Nakapang-hesusmaryosep ang mga silingan sa maong nasaksihan. Giwali sa Pari ang katalagsaon sa kaisog ni Lola Dagwa sa pagsugat sa iyang kamatayon.

Human sa Mesa, mibangon si Lola Dagwa ug gialsa na pod siya sa duha ka tawo nga iyang sinuholan ug gipagawas sa lungon ug miipon siya sa mga tawo nga nanagbilar, dili man manakod iyang sakit. Gisugat siya sa daghang mga pangutana sa iyang mga kaila kong nganong iya kining gibuhat? Mitubag si Lola Dagwa.

"Gitagalan nako'g napu ka adlaw sa Doktor sa akong sakit, human sa maong adlaw mamatay na ko. Tungod niini nagpabilar ako nga buhi pa aron masuwayan nako ang paghigda sa lungon ug mabilaran pod nako akong kaugalingon, maka-estorya-estorya ko sa namilar nako. Makakita ko nga nanimo sila'g kape ug biskwits, mohatag og hinabang, paghilak.

"Makadungog ko sa inyong mga pag-ampo, kay di na man nako ni mahimo ang tanan kong patay nako, kay kong magpakita ko, sigurado man gyung managan mo tungod sa kahadlok.

"Ug akong ipahibalo igkamatay nako wala nay bilar, ilubong nako sa menteryo. Babay ug daghang salamat ninyong tanan!"

Gisulti kini ni Lola Dagwa sa kadaghanan gamit ang mikropono. Mapahiyomon kaayo siya samtang ang nanagbilar iyahay'g lugod sa ilang mata, duna poy namahid og panyo ug nanikma.

Kada gabii sa Novena sa kalag ni Lola Dagwa, mosulod gayud siya sa lungon ug unya mobangon pod igkahuman sa Novena, mogawas sa lungon ug makighalubilo sa iyang mga anak, kaigsoonan, kaparyentehan ug sa mga silingan, kaamigohan, kaamigahan nga nanagbilar. Apan sa ikasiyam nga novena sa iyang kalag nga maoy katapusang novena. Wa na mobangon si Lola Dagwa sa gihigdaan niyang lungon. Patay na siya. (Katapusan)