Gula 30
“Pag-amping,” pahimangno ni Teresa.
“Salamat.”
Migawas na si Ronald sa Banlas Inn. Paghimuntog niya sa karsada, nakita niya ang bayhon nila ni Ka Henry nga migawas gikan sa kangitngit.
“Nabalaka mi’g maayo nimo,” matud ni Ka Henry. “Abi namo’g masakpan ka na sa mga army nga misulod sa hotel.”
“Kaganina ra unta kong mogawas,” matud ni Ka Ronald. “Wala lang ko mopahinayak dihang nakita ko ang sakyanan sa mga sundalo nga nag-parking sa gawas sa hotel.”
“Dunay unom ka army nga may dalang mga babaye nga mi-check in kaganina. Mora’g nag-short time ang mga kanahan.”
“Wa ka masayop. Magkanunayan kuno dinhi ang maong mga army. Nagkadaiyang babaye lang ang dad-on.”
“Amo untang birahan ang duha nila ka kauban nga nahibilin sa sakyanan. Wa lang namo ihinayon didto ra ba ka sa sulod ug wa makabantay.
“Maayo ra sab nga wa ninyo ihinayon kay tingalig mababoy ko didto sa sulod.”
“Unsa pay atong gidugayan,” misal-ot si Ka Martin sa panagsulti nila ni Ronald ug Ka Henry. “Mamiya na ta dinhi.”
Tuod man, namiya na sila sa maong dapit. -- Sumpayan pa