Walay kamatayon ang gugma

Gula 46

Gusto kong magmatinud-anon ka sa imong kaugalingon, Jody,” matud ni Randy. “Kun nakaseguro ka nga wala ka na mahigugma kanako, andam kong modawat sa kapakyasan sa gugma ko kanimo. Dili ko na ikaw samokon hangtod sa hangtod.”

Nagpabilin si Jody sa iyang kahilom. Dili siya makahimo sa pagprangka sa atubangan ni Randy nga wala na siya mahigugma niini tungod kay sa iyang kahiladman si Randy man ang gisinggit sa iyang dughan.

Gigunitan ni Randy ang iyang tuong kamot. Unya nakalitan siya dihang giukoban niini’g halok ang iyang mga ngabil.

Milugnot si Jody sa tinguha nga makalingkawas sa paghalok ni Randy kaniya. Apan gigakos siya ni Randy. Nahapaod hinuon og maayo ang iyang dughan ngadto sa dughan sa ulitawo. Ug misamot ang pag-ukob sa mga ngabil niini ngadto sa iyang mga ngabil.

“R-Randy, a-ayaw....” Mipusnga si Jody dihang milunga ang ulitawo sa pag-ukob sa iyang ngabil.

Ingon sa wala siya madungog ni Randy. Subli niining giukoban ang iyang mga ngabil. Mas pinadulot na ang paghalok ni Randy kaniya. Nabatyagan niya ang paglihok sa dila sa ulitawo sa ilawom sa iyang baba.

Dihay talagsaong kalalim nga iyang nabatyagan nga mikuyamang sa iyang kaugalingon. Dili siya makatabang sa iyang kaugalingon gawas sa pagbalos sa gihimo ni Randy kaniya. Nag-lips-to-lips sila. -- Sumpayan pa