Anino sa adlaw

Gula 29

Migawas gayod si Teresa sa lawak. Nahibilin sa sulod si Ronald nga ingon sa nabalisa. Giandam niyang daan ang iyang armas, panagana kun magkinaunsa man.

Paglabay sa pipila ka gutlo, nahibalik si Teresa sa lawak.

‘Wa diay kuydawo,” nagkanayon si Teresa.

“Unsay buot mong ipasabot?” Mikunot ang agtang ni Ronald.

“Matud pa sa nagbantay sa reception nga akong gipangutana, kanang mga army nga naa sa gawas may mga kauban nga nagdala’g mga babaye ug mi-check in sab dinhi.”

“Diay ba?”

“Matud pa sa receptionist, magkanunayan dinhi ang maong mga sundalo. Bisan kinsa lang nga mga babaye ang ilang dad-on dinhi. Mga palikero gyung dagko. Mga mapahimuslanon sa kahuyang sa mga babaye.”

Wala motingog si Ronald. Apan sa hilom mikagot ang iyang bag-ang.

Paglabay sa trayenta minutos, migawas og balik si Teresa sa lawak nga nahimutangan nila ni Ronald aron pagsusi kon naa pa ba gihapon ang mga army. Nahibalik dayon si Teresa sa lawak ug mipahibalo kang Ronald nga nakabiya na ang mga sundalo.

“Mamalik na sab mi sa bukid,” pananghid ni Ronald dayong tindog gikan sa gilingkoran niyang ngilit sa mahunolhunol nga kama. -- Sumpayan pa