Walay kamatayon ang gugma

Gula 46

“May third party ba nga na-involve niini, Jody?” Gikan ni Randy.

Wala gihapon motingog si Jody. Wala siya masayod kun unsay iyang itubag sa buot masayran ni Randy.

“Sakit kaayo alang kanako kining imong gibuhat, Jody,” ni Randy pa. “Unfair kaayo kini sa akong bahin tungod kay bulagan mo ako bisan wala akoy nahimong sala nganha kanimo. “Dili lalim kun ikaw pa ang nahimutang sa akong dapit.”

“Nagtuo ka ba diay nga ikaw ray gisakitan? Kahilakon nga namulong si Jody. “Lakip usab ako, Randy.”

“Nan, nganong lisodlisoron man nato ang atong kaugalingon? Nganong isakripisyo man nato ang atong gugma?”

“Tungod kay gipangayo sa kahigayonan, Randy?”

“U-unsay buot mong ipasabot?”

Wala na usab makatubag si Jody. Nasayod siya nga kun tubagon niya ang maong pangutana, kini ang maggahas og dalan aron matuki ang lintunganay’ng hinungdan kun nganong gusto siyang makigbulag kang Randy -- ang iyang amahan.

“Sultihi ko sa tinuod, Jody,” nagkanayon si Randy. “Nahigugma ka pa ba kanako?”

Miduko si Jody. Walay mga pulong nga nanglugwa sa iyang baba. -- Sumpayan pa