Walay kamatayon ang gugma

Misaludo ang security guard ngadto kang Randy human niini mahiling ang awto nga ilang gisakyan. Gisenyasan sila niini nga ipalahos na ang sakyanan nila ngadto sa parking area.

Sulod sa bugnaw’ng lawak sa hotel walay timik si Jody. Gikulbaan siya’g maayo. Bisan bugnaw ang sulod sa lawak sa gipaandar nga aircon apan gipaningot siya’g maayo. Gihulagway niya ang iyang kaugalingon nga nahisama sa usa ka kriminal nga bitayonon.

Miduol si Randy sa nahimutangan sa telepono ug nanawag og room service. Mi-order kini’g pagkaon alang kanilang duha. Pagkahuman, miduol kini kaniya.

“Maghulat lang ta’g kadiyot,” ni Randy pa. “Mga fifteen minutes moabot na kadtong gi-order kong mga pagkaon.”

“Unsa ba gyu’y tuyo nimo nako?” Usisa ni Jody.

“Simple lang,” matud ni Randy. “Gusto lang kong masayod sa lintunganay hinungdan kun nganong buot ka nang makigbulag kanako.

Wala makatingog si Jody. Maglisod siya sa pagpasabot ni Randy sa tanan. Mahimong tug-anan niya si Randy nga kagustohan kini sa iyang amahan. Apan nakaseguro siyang dili na siya makatubag sa higayon nga mangutana ang ulitawo kun nganong buot man sa iyang amahan nga maguba ang ilang relasyon. -- Sumpayan pa