Maestra

Dihang nahukas na ni Riza ang basa kaayo nga jacket nga iyang gisul-ob, nakita ni Sim nga basa usab kaayo ang T-shirt sa maestra nga mipilit gani sa iyang lawas.

“Riz kun ok ra nimo, duna ko’y oran nga T-shirt sa U-box sa akong motor. Limpyo na pero daan lang,” matud ni Sim dayong ukab sa lingkoranan sa motor ug gikuha ang pinilo nga T-shirt sa U-box.

“O, isul-ob na Riz para dili ka tugnawon pag-ayo. Problema lang kay wala ko’y dala nga bra,” pangomedya ni Sim ngadto sa maestra. Giluknit ni Riza ang kilid ni Simeon.

“Sige na, hobua na ang imong basa nga T-shirt Riz, motalikod ra ko,” dayon nagpasumangil si Sim pagtrapo-trapo sa motor.

“Angayan man sab diay ko sa imong T-shirt Sim,” nagpahiyom ang maestra nga misulti ngadto kang Sim.

Kay gamay ra man ang lingkoranan, mitindog si Sim aron makatarong paglingkod ang maestra, apan taud-taud giagda siya ni Riza nga magtupad lang sila’g lingkod.

Nagpatuso-tuso si Sim nga dili lang siya molingkod kay maikog siya nga basa ang iyang gisul-ob. Wala damha dunay kalit lang mikidlap nga daw gikuhaan sila’g hulagway, apan kilat diay kini nga gisundan sa lanog kaayong dugdog.

Wala tuyoa nga nakakagos si Riza kang Sim sa kakurat. “Ay sori kaayo Sim ha, nakuratan lang ko sa kusog kaayong dugdog.” “Walay problema Riz, sugot gani ko bisan magbuntag pa og dugdog para sige ka nga mogakus nako.

Gikalipay kaayo ni Sim sa hilom ang pagsige’g uwan kay nakahigayon siya nga madugay ang ilang panag-uban ni Riza.

“Tugnawa Riz uy, kanindot unta kun ako ka pang hinigugma matambalan unta ang akong gibati nga katugnaw,” komedya ni Sim sa maestra. “Mao g’yud, kun uyab pa nako ang akong kauban mogakos g’yud ko’g hugot niya,” dali nga tubag ni Riza.

Kalit lang milugapak ang laing masipa nga dugdog ug nakagakos na usab si Riza kang Sim sa kakuyaw. Daw diha ra duol kanila mobuto ang dugdog.

Ning higayuna, gigakos na ni Sim si Riza. “Ayaw kahadlok Riz, ingon g’yud niana kun magdugdog dinhi sa bukid, kusog kaayo kay dia man kita sa ibabaw sa bukid.”

Wala motukol si Riza nga gigakos siya ni Sim. Takulahaw lang nanginit ang kalawasan ni Sim kay nabag-id sa iyang dughan ang duha ka bungtod sa dughan ni Riza nga wala nay bra.

Mainampingon nga gihagkan ni Sim ang aping ni Riza. Abi niya’g masuko ang maestra, apan mihangad kini kaniya ug nag-ukobay dayon sila sa ilang mga ngabil. – (Padayonon)