Hahaaayy kanimo, Fredmon

Ang magtiayong Fredmon-Lusing wala makabaton og anak bisan upat na ka tuig sukad sa ilang kaminyoon. Usa ka Domingo niana samtang nagkuyog pagpanglakaw sila si Fredmon ug ang iyang kumpareng si Israel.

“Pareng Fred, aylag kasuko, ha, pero sultihan ta lang gyud kas tinuod.”

“Unsa man na, Pre?”

“Si Kumare Lusing ba, duna lagi iring-iring.”

“Ay’g tinunto diha, Pre, ha!” Nasalta ang kilay ni Fredmon.

“Lagi, Pre. Pipila na ka higayon nga kanang atua ka’s trabaho akong makita nga dunay lake nga mag-anhaan sa inyo unya manera sila ug taudtaod gyud nga magmingaw sa sulod. Unya makita nako nga mogawas ang lalake nga mora’g matagbawon kaayo.” Seryoso si Israel.

“Ayaw sudlig panuway ang akong hunahuna, Pre, ha!” Napikal si Fredmon.

“Na, naa ra nimo, Pre, kun di ka motuo.”

May nahunahunaan si Fredmon. Ug pagkasunod adlaw nagpakaaron-ingnon siya nga motambong sa trabaho pero dili diay. Miadto siya sa pikas sityo ug nanghuwam og pinuti sa iyang ig-agaw nga si Gally.

“Unsaon man ni nimong pinuti, Gaw Fred?” Natingala si Gally.

“Nakigduwa man gud kuno’g laing team si Lusing, Gaw. Kun tinuod man kini ug ako silang maaktohan, mopauli gyud unyang lalake nga magbitbit sa iyang ulo!” Sangko na sa langit ang kalagot ni Fredmon.

“Uy, ayaw na buhata, Gaw, mapriso ka!”

“Ah, bahala na! Adto na ko, Gaw!” Ug misirit si Fredmon nga nagbitbit na sa pinuti.

“Gaw Fred! Gaw...patuo, Gaw!” Paapas ni Gally apan gilamoy na sa kawalaan si Fredmon.

Pag-abot ni Fredmon sa ilang balay iyang namatikdan nga mingaw tuod kaayo. Mainampingon siyang miduol.

“Tinuod gyud tingaling nakigduwag laing team si Lusing da,” ni Fred sa kaugalingon. “Naa ay, mingaw kaayo ug serado ang pultahan ug mga bentana. Karon ka lang gyung lakeha ka’g kinsa ka man ugaling. Hmp!” Nagpaminti na si Fredmon.

Gitapion ni Fredmon ang iyang dunggan sa sera ug iyang nabati nga adunay nag-agutnga sa sulod. Iyang gitindakan ang sera ug maoy mihimamat sa iyang mga mata nga ‘nagkumbate’ na ang iyang asawa ug ang lake niini. Pulos na walay mga sapot ang duruha.

“Aha! Tinuod gyud diay nga nakigduwa ka’g laing team, Lusinga ka, ha! Unsa man tawoy akong sala nga nagbinuang man ka, Singgggg!!!” Ug gihuyad ni Fredmon ang pinuti aron hapsan ang lake sa iyang asawa. Apan...

“Hoy, Fredmon!” Misinghag si Lusing. “Wa diay ka motrabaho? Gamay ra ka’g makobra rong kinsenaha? Dako ra ba ka’g utang sa Tanduay sa tindahan nilang Joy Leandro!” Si Fredmon na hinuoy gikasab-an sa iyang asawa. “Trabaho didto uy! Pag-half day na lang!”

Unya mikalma si Fredmon ug nagkanayon: “Hala, pagtiwas mo diha kay iuli ko ring Agaw Gally ang pinuti unya molahos na lang kos trabahoan,” kalma nga mibiya si Fredmon.

Hahaaayyy...!!! Unsa ka mang matanga sa pagkabana, uy, Fredmon! (Kataposan)