Gula 43
Apan sa paggawas niya sa buhatan sa Silver Star Daily, nakugang siya. Nakita niya si Randy nga nagbarog sa gawas sa lobby. Wala nay panahon sa paglikay kay nakita na siya niini. Midali kini pagduol kaniya.
“Maayo kay nigawas ka na,” nagkanayon si Randy. “Kaganina ra kong nagpaabot nimo.”
“U-unsay imong tuyo?” Sukit ni Jody.
“Gusto kong makigsulti nimo.”
“Alang sa unsa pa?”
“Daghan kita’g angay panagsultihan. Dili mahimong bugtoon mo ang atong relasyon sa dakong kasayon ug sa walay igong hinungdan.”
“Sa sunod nang higayon kita magsulti. Okey?”
Ug mihana paglakaw si Jody. Apan gigunitan ni Randy ang iyang bukton.
“Randy, please,” hangyo ni Jody. “Buhii ko. May mga mata nga nagtan-aw nato.
“Pwes, uyoni ko sa akong gusto kun dili ka gusto nga mag-eskandalo ako,” ni Randy pa. “Magsulti ta. Bisan kini na ang kataposang higayon sa atong panagsulti. May gusto lang kong matud-on gikan kanimo. Please, Jody...” -- Sumpayan pa