Saksi sa matuod

Duha ka adlaw na lang og moabot na ang gitakdang kasal ni Fred ug Arlene. Apan inay kalipay ang bation ni Arlene gisanapan na hinuon siya sa tumang kalibog. Naglibog siya karon kun ipadayon ba niya o dili ang pagpakasal kang Fred. May mitawag man ugod kaniya nga usa ka babaye nga wala magpaila didto sa iyang gitrabahoan kaganina ug misugilon kini kaniya sa tanang sekreto sa iyang pamanhonon.

       "Unsa bay nahitabo nimo, Day Arlene, nga nagmagul-anon ka man?" Gisukna siya sa iyang magulang nga si Tony dihang nakita siyang naghinuktok samtang naghukdong sa bukas nga bintana sa ilang balay.

       Nanghupaw si Arlene. Unya... "Naguol man god ko sa akong nasayran bahin kang Fred, Kuya. Duna man goy usa ka babaye nga mitawag nako sa telepono didto sa opisina kaganina ug misugid nako sa matuod kuno nga pagkatawo ni Fred!"

       "Ayaw una og tuhoi ang gisulti sa maong babaye, Day Arlene. Basin og gidaot lamang niya si Fred aron sa ingon dili mo na ipadayon ang inyong kasal." Ni Tony pa dayong pikpik sa abaga ni Arlene.

       "Unsa man kaha ang angay nakong buhaton aron mawala kining kalibog nga mihasol nako karon, Kuya?"

       "Panid-i si Fred, Day Arlene. Mentras wala pa kamo makasal sutaa gayud kun unsa ang matuod niyang pagkatawo!"

       "Husto tuod..." Tuaw ni Arlene dayong yango. "Ugma dayon sugdan ko na ang pagpaniid kaniya!"

       Pagkaugma mipalta sa trabaho si Arlene aron tumanon ang sugyot sa iyang magulang. Usa nalang ka adlaw ug moabot na ang gitakda nilang kasal ni Fred busa dili niya usikan ang panahon. Panid-an niya si Fred!

       Wala pa gani moabot ang alas singko sa hapon diha na si Arlene sa gawas sa kompaniya nga gitrabahoan ni Fred nga mao ang MYM Resources Corp. Didto siya magpahipi sa sulod sa taksi nga gituyo sab sa pag-parking dili halayo sa gate sa naasoy'ng kompaniya. Alas singko sa hapon ang tinggawas sa mga trabahante sa naasoy'ng kompaniya.

       Paglabay sa pipila ka gutlo, nakita ni Arlene nga misugod na sa pagpanggawas ang mga trabahante sa MYM Resources Corporation. Dihadiha gipunting dayon niya ang iyang panan-aw ngadto sa gate sa naasoy'ng kompaniya nga mao day bugtong agianan sa tanang trabahante. Wala madugay, nakita niya si Fred nga migawas. Ug dali kining misakay sa itom nga kotse nga taudtaod nang nag-parking sa daplin sa karsada ug duol da sa gate. Gimandoan dayon ni Arlene ang drayber sa taksi nga iyang giluwanan sa pagsunod sa awto.

       Didto mopaingon ang kotse nga giluwanan ni Fred sa usa ka motel nga nahimutang sa suok nga bahin sa ilang lungsod. Dihang misulod na si Fred ug ang kauban niini sa usa ka lawak, nanaog usab si Arlene sa taksi ug miduol sa usa ka tindahan nga nahimutang sa atbang ug nagmeryenda. Pagkatapos miduol siya sa lawak nga gisudlan ni Fred ug sa kauban niini. Kang-a og diyotay ang pultahan sa iyang paghiabot busa mideretso nalang siya sa pagsulod.

        Migawas si Arlene sa lawak nga nagpanghiram sa mihuot niyang dughan. Unya midagan siya palayo sa naasoy'ng dapit nga nagkapandolpandol tungod kay hanap na ang panan-aw gumikan sa mga luha nga miagas sa iyang mga mata. Nakita gayud niya sa akto si Fred nga iya untang pamanhonon nga miromansa sa kuyog niining lalaki sa sulod sa lawak sa motel ug hubo pa gayud ang ilang mga lawas! (Katapusan)