Anino sa adlaw

        “Nakasabot ko sa imong tumong, Ka Ronald. Pero nabalaka ko nga ang imong hinigugma maoy mahimong babag sa umaabot nga mga adlaw sa nasugdan mo na pagdawat nga hagit ug kawsa sa kalihokan.”

        Gipasabot og maayo ni Ronald si Kumander Abay sa lintunganay niyang tumong sa pagpakigkita kang Teresa. Gipasaligan niya ang kumander nga si Teresa dili mahimong babag sa iyang pag-apil sa kalihokan sa mga rebelde.

        “Dili na ko makasibog sa ako nang nasugdan, Kumander,” nagkanayon si Ronald. “Duna lang koy gustong husayon sa akong pribadong kinabuhi.”

        “Mosugot ko nga molugsong ka sa patag,” matud ni Kumander Abay. “Apan pakuyogan ko gihapon ikaw nila ni Ka Hengry.”

        “Ikaw ang mag-igo, Kumander.”

        Tuod man, milugsong gayod sa patag sila si Ronald ug mga kauban. Gidumdom niya ang Banlas Inn nga maoy dapit nga gikasabotan nila ni Teresa nga adto mag-abot. Alas nuybe na sa gabii ug nakaseguro siyang nagpaabot na si Teresa sa sulod.

        Si Ronald ray misulod sa Banlas Inn. Sila si Ka Henry nagpabilin sa gawas aron maniid sa palibot. Miduol dayon si Ronald sa reception desk ug nangutana sa nagbantay kun hain nga lawak nahimutang si Teresa. Mitug-an kaniya ang babayeng nagbantay sa reception sa dakong kasayon sa room number ni Teresa. -- Sumpayan pa

Sugilanon