Kahingawa sa amigo

Sabado. Alas kuwatro y medya sa hapon. Naglingkod si Ritche Tibon sa bangko kilid sa tindahan sa managtiayong Fernando-Teddylyn. Nagbarog ang maong tindahan sa eskina sa nagkuros nga mga dalang Lapaz ug Cuenca. Nahimutang sa habagatang-kasadpan nga eskina ang maong tindahan.

Padulong sa kasadpan, mga singkuwenta ka metros ang gate sa Amiraw Central School. Padulong sa silangan, mga usa ka gatos ka metros, naa ang munisipyo sa lungsod sa Amiraw. Padulong sa amihan, usa ka kilometro naa ang merkado sa lungsod. Padulong sa habagatan, tunga sa kilometro naa ang simbahan sa San Sebastian. Naghulat si Ritche sa santos nga misa nga saulogon sa panimalay ni Marivel manghod ni Fernando di layo sa maong tindahan dapit sa kasadpan. Motambong si Ritchie sa misa kay alang ni sa ika-50 ka adlaw'ng natawhan ni Marivel nga dakong masakiton. Silingan ug suod nga higala ni Ritche si Marivel.

May niabot nga Isuzu Crosswind nga puti. Di maklaro kun kinsa ang nagmaneho. Tinted man ang mga bintana. Nakurat ug nahingangha si Ritche pagkakita niya sa nanaug. Si Roy Zapanta. Iya sang silingan ug kababata. Tulo ka tuig na niyang wa hikit-i. Nihugo si Roy nga morag na-solid ang lawas. Dili pareha kaniadto sa kataposang nahinumduman ni Ritche sa lawas ni Roy nga morag si Ike Lozada. Karon mora nag si Derek Ramsay. Daw nikaging si Ritche sa iyang gilingkoran samtang nihinay og lakaw si Roy padulong sa iyang nahimutangan. Gibati ni Ritche ang tumang kalooy ug kahingawa sa hitsura sa iyang higala.

Si Ritche nga usa ka enhenyero ug manedyer sa Maritrans Engineering, nia ra sa ilang lungsod magtrabaho. Kay ilang kompanya naa ra man sa Poblasyon. Maong tagsa ra gyud siya masuroy sa siyudad. Ang kapikas ni Ritche nga si Wella naa ra sa balay manawat og tahionon.

Si Roy dunay balay di layo sa gate sa saring publiko sa ilang lungsod. Dos andanas ang maong balay. Apan mga anay na lay nagpuyo niini. Tulo ka tuig silang way uli-uli. Tua na nagmanokan sa Canduman, Mandaue diin may karenderya siya uban sa iyang kapikas nga si Edna. Naglikay sila sa gubot kay ang suod nga silingan ni Roy nga iyang bayaw nga si Andy ug kapikas niini nga si Bella nagkalalis niya ug hapit gyud magkadinapatay.

Si Marivel dagang guwang. Sekretarya siya sa mayor sa ilang lungsod. Gihatagag indefinite leave sa mayor tungod sa iyang sakit. May cancer sa matris. Di na kono siya magdugay. Maong nipasiugda si Wella nga magpamisa silang tanang mga kaklase ni Marivel, ka-batch sa ilang alumni sa hayskul. Dako ang hikay sa maong adlaw kay daghang mga klasmet, silingan ug higala nga nitampo. Gawas sa budget ni Marivel ug sa iyang mga igsoon.

"Kumusta young man!" ni Roy ngadtong Ritche. (Young man may ilang sangpitay).

"Nia young man. Nagtikawtikaw pa ning kalibutan" ni Ritche nga nagpahiyom. Gidawat niya ang toong kamot sa higala nga gitunol. Naglamano sila.

"Lingkod" ni Ritche. Nilingkod si Roy.

"Hapit man ko wa kaila nimo oy! Pagkadako nimong pagkausab!" ni Ritche.

"Mao lagi. Daghan na kog sakit. Sugo sa doctor nga magpa-reduce ko" ni Roy.

"Unsa man diay imong mga sakit?" ni Riche.

"Dayabitis. Hayblad. Atraytis" ni Roy.

"Pero namatso na man hinoon ka. Kuyaw nag magselos unya imong kapikas," ni Ritche.

"Wa na siyay angay selosan. Tiguwang na ta" ni Roy. Nakuryoso’g maayo si Ritche sa dakong pag-us-us sa timbang sa higala. Katalirongan sila.

"Niining imong pagdaut ron, duna pa kaha kay kusog?" komedyang pangutana ni Ritche sa katupad.

"Sa tambok pa ko, minus kog kusog. Karon hinoon, di sa panghambog, makaalsa pa man kog four gallons nga bottled water pag-ilis sa among dispenser" ni Roy sa malomong tono.

"Bi papislita kos imong braso. Kun di na ba luyat" ni Riche.

Gipislit gyud niya ang walang braso sa higala. Nagpatara lang si Roy. Wa nilikay. Wa sab siya mangosog aron pagpagahi sa iyang braso.

"Matay! Hugot pa man imong braso!" ni Ritche.

"Wa na koy bisyo. Apan wa ko nibiya sa exercise. Aerobics, kalistiniks, jogging, swimming, hiking ug basketbol" ni Roy.

"Okay pa man diay kaayo ka! ni Ritche nga nagpahiyom. Unya nahilom siya. Kay siya daghan nang gipamati sa lawas. Nakahukom siyang magtimitimi sa iyang kaon. Hinayhinayan na ang inom ug panigarilyo. Ug magsugod na sab siya’g ehersisyo. Apan pa-tsek ap gyud una siya.(Kataposan)