Anino sa adlaw

Gula 22

“Unsay paagi nga angay tang buhaton aron maluwas ug magpadayon ang kawsa, Kumander?” Si Ronald maoy nangutana.

“Nagkinahanglan tag dugang mga sakop,” padayag sa kumander. “Mopahigayon ta’g kalihokan pagpang-recruit og bag-ong mga sakop. Palapdan usab nato ang pagpangolektag revolutionary tax aron makalahutay kita dinhi sa bukid.”

Gidetalye pag-ayo sa kumander ang tanan nga iyang nahunahunaan nga angay buhaton aron mobalik paglig-on ang ilang pundok. Iyang giat-at punto por punto ang tanan nga angay nilang masayran. Miuyon ang tanan sa iyang mga plano.

Human sa ilang panagtigom, mibalik na si Kumander Abay sa iyang payag. Nakamatikod dayon siya nga misunod kaniya si Ronald.

“May mahinungdanon kong tuyo nimo, Kumander,” nagkanayon si Ronald.

“Unsa kana, Ka Ronald?” Sukit sa Kumander nga naglingkod sa ikaduhang ang-ang sa hagdanan sa iyang payag.

“Managhid unta ko nimo nga sa Huwebes molugsong ko sa patag.”

“Alang sa unsang katuyoan, Ka Ronald?”

“Makigkita ko sa akong hinigugma.”

“Na sab? Di ba gipakigkitaan mo man siya kagabii?”

“Tinuod kana. Pero mubo ra ang among panahon kagabii. Daghan pa ko’g angay ipasabot kaniya, Kumander. I owe her an explanation.” -- Sumpayan pa