Walay kamatayon ang gugma

Gula 39

Wala siya makasabot sa iyang gibati human mabasa ang sulat ni Randy. Mora’g may bahin sa iyang pagkatawo nga natukbil niini. Miadto siya sa banyo. Human kaserad-i ang pultahan, gipahungaw niya ang kahimangod nga mihuot sa iyang balatian. Nagpatulo siya sa iyang mga luha.

Nagabhian si Jody sa pagpauli. Dugay man gud siyang nakahuman pagsulat sa balita nga iyang gisulat. Nagsulat pa usab siya sa iyang lindog sa Silver Star Daily. Wala siya sa maayong mood sa pagsulat tungod kay ang iyang kaisipan gihasol sa paghunahuna kang Randy mao nga wala dayon siya makahagilap og tema nga maayong sulaton alang sa iyang lindog.

Sa iyang pag-abot sa balay lapas na ang ikawalo sa kagabhion. Iyang naabtan si Megan diha sa sala. Ang pagtagad niini didto ra sa teleserye nga gitan-aw sa telebisyon.

Gipalong ni Megan ang tv pagkamatikod niini sa iyang pag-abot.

“Didto ko sa office ni Randy kaganina,” taho ni Megan. “Nangumosta siya nimo.”

Wala siya motingog. Misantop sa iyang hunahuna nga malagmit nasayod na si Megan sa hinungdan kun nganong wala na mopakita si Randy sa ilang pinuy-anan. -- Sumpayan pa