Motorsiklo

May motorsiklo ko nga Y7-150 cc. nga miserbisyo kini kanako sud sa 15 anyos, samtang diha pa ko manarbaho sa PNOC Lapulapu Slipways, dakbayan sa Lapulapu. Gisayon-sayon ko lang sa pagkabayo, halos pabalik-balik nalibot ko ang kabaybayonan ilabina kadtong dapit nga adunay dunggo-anan o pantalan sa tibook lalawigan sa Sugbo.

Taas kaayo’g lahutay. Wa ko kahinumdom nga napaatiman ko ni’g mekaniko. Mosuki kun lain mokabayo, magperwisyo ang dinaganan. Apan kun akoy mosakay, maayo man ang dagan ug tulin pa kaayo.

Sukad, wa ko makatilaw og dakop sa kadalanan ug bisan sa garas o disgrasya. Sa dihang miresayn ko sa PNOC, aron manimpad ko’g laing kahigayonan sa Manila, gibilin ko ni sa amigo aron magamit niya.

Paghiuli nako, nasayran kong kausa ra nagamit sa gibinlan ko kay nabagnos ug napiang.

Sa dihang molarga na sab ko sa Manila, may lain kong amigo nga nihangyo nga adto kini ibilin kaniya. Sa didto nako, gipahibalo ko nga i-uli na niya tungod kay diriyot siya madisgrasya.

Mitawag sab ang asawa ko nga may mopalit. Nisugot ko kay tua na man ko magtrabaho didto. Nasayran ko na lang nga nakaligis og bata ang nakapalit sa akong motorsiklo. (Katapusan)