Kadtong nahitabo nga tulis sa diyep

Hapon kadto ug adlaw'ng Sabado. Mingaw ang dalan sa Veles sa dakbayan sa Cagayan de Oro. Ang drayber ug ang konduktor sa diyep medyo natingala nganong ingon niadto ang dagan sa trapiko niadtong higayona.

Walay laing makita nga suluguon sa balaod nga mobantay sa mga tawong mopasipala sa ilang isigkaingon. Hinuon, hapit na mapuno ang diyep human mosakay ang mga estudyante sa Xavier University, butang nga gikalipay sa drayber.

Daghan mga pasahero nga mopaingon ngadto sa Barangay Bugo sakop sa dakbayan sa Cagayan de Oro.

"Bugo! Bugo!" singgit sa konduktor. "Sige Madam! Sa Bugo kita!"

"Sige Ma'am! Ipasulod si Sir!" pulong usab sa drayber. "Sige Ma'am! Ipasulod si Sir kay aron madali."

Ambot nganong gamay ra man ang mga tawo niadtong higayona. Hinuon, taliabot ang ulan. Ang konduktor nagkapuliki pag-atiman sa mga pasahero nga buot mosakay.

Ug samtang ang diyep nagsubay sa dalan Corrales, tulo ka mga tawo ang misakay nga morag kadudahan ang lihok. Ang drayber gibati og kakulba ug diha sa iyang kaugalingon ang pangutana kun kinsa kining mga tawhana?

Uban sa mga pasahero, mao ang duha ka managhigugmaay ug nasayran niadtong tulo ka mga tawo nga ang babaye anak sa usaka negosyante nga taga Aplaya. Ug pag-abot sa usa ka hilit nga dapit, sa kalit gipagula sa tulo ang dala nilang pistola ug mideklarar sila og tulis ngadto sa mga pasahero, butang nga gikalisangan sa pasahero.

"Hala! Ihatag kanamo ang inyong kuwarta ug cell phone kun dili ninyo gustong dunay daotan nga mahitabo kaninyo," pulong sa usa ka tulisan. "Dallii!"

Ang drayber bisan ang konduktor, walay nahimo. Gusto untang bunalan og tubo ang usa ka tulisan nga mition kaniya apan gibati og kahadlok ang drayber tungod sa 45 kalibre nga pistola nga gition niini.

Busa, nagpaabot sila sa ilang nahimutangan ug nagpaabot na lang kun unsay buhaton sa mga responsable. Human sa pagpanulis, mimando ang lider sa pagsibat samtang wala pay polis.

"Sibat, Bay, kay basin kun moabot ang parak," pulong sa lider. Apan sa wala pa sila mosibat, gidala nila kadtong babaye nga ilang gituhoan nga anak sa negosyante nga taga Aplaya, biniyaan ang hinigugma niini.

Milabay ang usa ka semana, human sa tulis, nakita sa mga ginikanan ang patay'ng lawas niadtong biktimang babaye nga gidala sa mga tulisan sa usa ka hilit nga dapit sa Cagayan de Oro.

Hapit mahugno ang galamhan sa mga ginikanan ilabi na nga ang ilang anak talapuson na ang iyang pagtuon sa kolehiyo. Ug ang lalaki nga hinigugma sa maong babaye nga kauban usab sa pagpanulis, gibati usab og kaguol sa nahitabo sa hinigugma.

"Mga walay kaluoy! Mga salbahis!" pulong sa hinigugma. "Silotan unta kamo sa Diyos sa inyong gibuhat."

Ang mga ginikanan, kaha inpluwensyado sa dagkong tawo sa dakbayan, naningkamot nga mahulog sa mga kamot sa balaod. Apan gidangtan na lang og bulan wala pa gayod masikop ang mga suspetsado.

Ug ang lalaki nga hinigugma sa babaye, ingon og dili makadawat sa nahitabo sa iyang hinigugma, nakita na lang sa sulod sa iyang lawak nga wala nay kinabuhi.

Nga sa ato pa, sa maong tulis nga natigayon niadtong adlawa, duha ka kinabuhi nakalas. Asa man ang mga ginikanan mangita og hustisya sa nahitabo sa anak nga kun wala pa unta ang maong tulis, wala untay daotang nahitabo niadtong duha kamga linalang nga gipangga sa ilang masig ka ginikanan? (Katapusan)