Walay kamatayon ang gugma

Gula 35

Kalit lang nausab ang dagan sa iyang kinabuhi. Gilikayan na niya si Randy sa hingpit. Nag-ilis siya’g SIM aron dili na makakontak ang ulitawo sa iyang cellphone. Giprangkahan niya ang ulitawo usa ka higayon niana nga nagkasulti sila sa telepono nga putlon na niya ang ilang relasyon. Wala na siya mosanong sa hangyo sa ulitawo nga magkita sila.

Sakit alang kaniya ang pagbuhat sa ingon. Usa kini ka dakong sakripisyo sa iyang kaugalingon. Sa iyang pagbati. Apan pilit niyang tumanon kay maoy pagbuot sa iyang amahan sa katarongan nga wala niya hisabti.

“Nganong wala na man moanhi si Randy sa ato?” Usa ka higayon niana gipangutana si Jody ni Megan.

“Ambot lang,” mao ray gikatubag ni Jody.

“Nag-away mo?” Dugang pangutana ni Megan. “O nagbuwag na ba hinuon?”

“Megan, mahimo ba,” mihangyo si Jody. “Ayaw una pangutikuti mahitungod kang Randy. May problema kaming giatubang karon.”

“Okey,” ni Megan pa. “Mao man kaha gud.”

Dayon misulod si Megan ngadto sa lawak niini. -- Sumpayan pa