Gula 17
Milungtad og dugay ang panagsulti nila ni Ronald ug Teresa. Gipasabot niya’g maayo ang dalaga sa daghan kaayong hinungdan nganong nagpabukid siya. Sanglit nasayod na mang daan si Teresa nga usa siya ka aktibista sa nag-eskuyla pa siya, kadali rang nakasabot ang dalaga sa iyang gihimo.
“Nahitabo gyud ang akong gikahadlokan,” ni Teresa pa.
“Unsay buot mong ipasabot?” Gitutokan ni Ronald ang dalaga.
“Nahadlok ko nga mahatagan og mas bug-at nga kahulogan ang imong pagka-aktibista kaniadto. Ug karon nahitabo gyud kini. Usa ka na ka rebelde. Layo ka na kanako. Labaw sa tanan, kaaway ka na sa kagamhanan.”
“Gikasubo ko, Teresa. Igo lang kong nagsunod sa awhag sa ideyolohiya.”
May isulti pa unta si Teresa apan may nanuktok sa pultahan. Nahatan-aw ang dalaga kang Ronald. May kabalaka ang tinan-awan niini kaniya. Gisenyasan kini ni Ronald nga mokalma lang. Dayon mainampingon siyang miduol sa pultahan ug giablihan kini. Si Ka Henry ang didto sa gawas.
“Mamiya na kita dinhi, Ka Ronald,” nagkanayon si Ka Henry. “Tingalig may makataho ngadto sa mga army nga nia ta dinhi.”
“Mananghid una ko ni Teresa,” niya pa dayong biya sa pultahan. -- Sumpayan pa