Walay kamatayon ang gugma

Gula 34

“B-bahin sa unsa kana, Dad?” Pakisusi ni Jody.

“Bahin kang Randy Maglana.”

“K-kang Randy? Nga-ngano man diay?”

“Gusto ko nga likayan mo na siya. Putla ang inyong relasyon.”

“U-unsa? P-pero ngano man, Dad?” A-abi ko bag...”

“May nasayran ako bahin sa iyang pagkatawo nga dili nako madawat.

“Kay unsa man diay ang imong nasayran bahin kang Randy, Dad?”

“Dili ko pa kini ikatug-an kanimo sa pagkakaron. Basta kay likayi gayod si Randy. Nakasabot ka? Likayi si Randy Maglana kun dili ka buot nga masuko ako kanimo. Putla ang inyong relasyon sa labing daling panahon.”

Alang kang Jody, ang tingog sa iyang Daddy maoy balaod nga kinahanglang iyang pagasundon. Bisan lubog alang kaniya ang hinungdan ug bug-at sa iyang balatian ang kagustohan sa iyang amahan, gilikayan niya si Randy. Dili siya buot nga masuko ang iyang amahan kaniya. Maong dili siya magtuman sa iyang gusto. Sundon niya ang pagbuot sa iyang amahan. -- Sumpayan pa