Ang kapalaran

Bisan supak unta sa iyang kabubot-on apan napugos g’yud si Wendell pagpatibol ni Christy ngadto ni Arthur kay dili siya makabalibad. Kun wala pa si Arthur dili unta mapadali ang paglusot sa iyang mga papeles sa bar didto sa City Hall.

Buot ni Arthur nga dad-on niya’g panuroy si Christy, apan wala g’yud mosugot ang Bol-anon nga dancer. Milakaw na lang si Arthur. Kini maoy nakapadayeg pag-ayo ni Wendell kang Christy nga dili diay basta-basta nga mouban og lalaki.

Nahinumdom siya sa gisulti ni Christy nga bisan og nagtrabaho siya og bar didto sa Tagbilaran kaniadto, apan wala gayud siya makiglambigit og lalaki. Nahuna-huna ni Wendell nga swerte siya nga gitugyanan dayon ni Christy sa iyang kaugalingon.

Samtang nag-inusara nga naglingkod si Christy sa usa ka lamesa, giduol siya ni Wendell ug giingnan nga dili na lang motiwas pagsayaw kay dad-on niya kini og pagpanuroy.

Giingnan ni Wendell ang iyang floor manager nga dad-on niya si Christy kay naghuwat niini sa gawas si Arthur.Gipasirit dayon ni Wendell ang iyang kotse ug didto sila mipaingon sa suki niyang motel sa Guadalupe. “Sir Wendell wala na hinoon ko makatiwas og sayaw. Wala na koy kita ani ron. Kun dili pa tika crush Sir Wendell dili g’yud ko mouban nimo,” matud ni Christy.

“Mao ba? Ako ray bahala sa imong kitaon unta karong gabhiona, pakapinan pa tika,” giingnan ni Wendell si Christy, dayong gakos niini ug giukoban ang iyang mga ngabil sa mainitong hawok. Si Wendell maoy ikaduhang lalaki nga nakaangkon sa pagka babaye ni Christy. Wala makasabot si Christy nganong gaan kaayo ang iyang buot ni Wendell. “Ayaw na lang pag Sir nako, Wendell na lang ang itawag nako sama sa ubang dancer.”

Nahitabo na usab ang mainitong sambunot sa kama. Bisan si Wendell daw sa dili kapoyan nga mibalik-balik pag-angkon sa pagkababaye ni Christy. Hilom nga gitago ra nila ang ilang relasyon.

Usa ka gabii niana, sa dayon nang human og sayaw ni Christy atubangan sa daghang customers, giduol siya sa floor manager ug giingnan nga itibol siya sa lalaki nga naglingkod sa duol sa counter.

Giduol ni Christy ang customer ug nahingangha siya kay ang iyang kanhi hinigugma sa Bohol maoy buot makig-tibol kaniya.

Nagkabuwag sila si Christy ug Roger kay nakigminyo kini og laing babaye. Si Roger maoy una nga lalaki nga gitugyanan ni Christy sa iyang kaputli apan wala na siya’y gugma kaniya human kini makigminyo’g laing babaye. (Sumpayan pa)