Walay kamatayon ang gugma

“Mao kana, Miss Garcia. Nagpatawag na ko’g meeting sa board of editors ug silang tanan nagkauyon nga ikaw maoy palingkoron isip bag-ong opinion editor sa atong pamantalaan.”

“Salamat sa inyong pagsalig nako, Sir. Gikalipay ko kini pag-ayo. Paningkamotan ko nga mahimong takos sa inyong pagpili kanako.”

“Good. Misalig ako sa imong katakos, Miss Garcia. Nakaseguro ko nga mohaom ka sa bag-o nimong posisyon.”

Wala na makatingog si Jody. Daw gitaoban ang iyang dughan sa dili mahubit nga kalipay gumikan sa maayong balita nga miabot kaniya karong adlawa.

“Dili kay kana ra, Miss Garcia,” nagkanayon si Mr. Beltran.

“Unsa pa man diay, Sir?” Sukit ni Jody.

“Sa Lunes puhon,” sa editor pa,“dungan sa imong paglingkod sa bag-o nimong posisyon, magsugod usab ang bag-o mong column. Ikaw nay bahalang magpili sa imong column title. Thrice a week ang frequency niini.”

“Thank you, Sir,” mao ray nalitok ni Jody.

Human sa ilang panagsulti, migawas na si Jody sa buhatan ni Mr. Beltran. Iyang naabtan si Jasmine nga may gikasulti sa telepono. Pagkakita niini kaniya,misenyas kini kaniya nga iya ang maong tawag. -- Sumpayan pa