Anino sa adlaw

Kadali rang naanad sa bukid si Ronald. Usa pa gani siya ka semana sa kampo sa mga rebelde nga iyang giabinan,sinati na niya kaayo ang mga bulohaton. Mitabang siya sa iyang mga kauban nga nananom og mga lagutmon. Nalingaw siya sa maong buhat.

Usa ka higayon niana, nakadawat sila’g kasayoran nga mohimo’g pagpatrolya ang kasundalohan sa usa ka barangay. Mimando dayon si Kumander Abay nga banhigan nila ang mga sundalo aron makakuha sila’g dugang mga armas. Giplano nila’g maayo ang pag-ambush sa mga sundalo aron dili sila mapakyas.

Mao kadto’y nagsilbing baptismal of fire kang Ronald isip bag-ong sakop sa walhon nga kalihokan. Abtik siya kaayong nakigsangka sa kasundalohan.

Daghan sila’g napatay nga mga sundalo. Kun wala pay miabot nga reinforcement ang kasundalohan, hayan mahurot gayod nila’g patay ang mga sakay sa duha ka sakyanan nga ilang giambusan. Misibog sila dihang ilang namatikdan nga may nagsingabot nga laing grupo sa mga sundalo. Apan nakadala gayod sila’g mga armas.

Dako’g natampo si Ronald sa kalamposan sa ilang pagpamanhig. Wala siya’y kukahadlok nga nakigsangka sa mga sundalo. Daw anad na siya sa panggubatan bisan unang higayon pa lang siyang nakasulay og gira. Nahimuot pag-ayo si Kumander Abay sa gipakita niyang lihok. Nakadayeg kini sa iyang kaabtik. -- Sumpayan pa