Mga bulak alang sa mangtas

Naghinunghongay sila si Pidot ug Marcos dihang nahilabay si Encarnacion sa tindahan ni Inse Olang. Pasado na alas siyete sa gabii ug niining mga orasa makita dayon si Encarnacion nga manaog sa ilang karaang balay ug unya seksi kaayong mopaso paingon sa dalan diin adto siya mag-atang og sakyanan.

Ingon gyud kanunay niini ang masaksihan sa mga silingan kang Encarnacion ug duna dayoy mga tabi-tabi nga si Encarnacion moadto na sa mga dapit diin adto siya mangabat.

Ug usa sa mga nakamatikod niini gawas kanilang Pidot ug Marcos mao si Inok. Anak og manananggot kini si Inok ug kun mahitabo nga may lakton ang iyang amahan nga si Kadyo siya usahay ang mosanggot sa mga punoan sa lubi nga gisanggot sa iyang amahan.

Ug gikan sa taas sa lubi labi nag hiabtan siya’g kilomkilom o di ba kagabhion mao gyu’y iyang makita si Encarnacion nga manaog sa ilang balay nga seksi kaayo sa gisul-ob niining miniskirt ug magpanglad-ok usahay si Inok nga magtan-aw sa dalaga nga maglakaw na paingon sa dalan sa karetera.

Dugay na siyang naibog ni Encarnacion apan ang mga ulitawo dinhi naglikay sa dalaga kay lagi nadungog man nga siya ang midawat sa kabilin sa pagka-ungo sa iyang nanay Agosta.

“Tua na sad si Encarnacion, bay Pidot,” ni Marcos pa. “Mangabat na pud to siya...”

“Yamat, mora’g dili katuo, Bay Marcos da, kay guwapa man kaayo na siya. Pero, maoy may gisumsoman sa mga tabi dinhi sa ato, maong motuo na lang sab ko,” ni Pidot pa usab ngadto sa iyang higala.

“Ibog kaayo ko anang bayhana, Bay. Gusto kong angkonon ang iyang katahom,” ni Marcos pa. Tuadtaod na siyang naibog sa dalaga apan nangita lang siya’g igong higayon.

“Aw, way problema kay si Encarnacion man lang usa sa ilang balay,” ni Pidot pa nga mitutok kang Marcos. “Unya, di ka mahadlok nga wala man gani mga ulitawo dinhi sa ato nga nangahas nga manguyab ni Encarnacion?”

“Dili ni moila og ungo ning akong armas, Bay Pidot basta motukar na ning akong gana sa babaye,” ni Marcos pa nga mitingsi.

“Unya, unsaon man lang na si Inok, nga nangulitawo man kuno nang Encar,” ni Pidot pa. “Siya ra pud ang misuway pagpangulitawo anang bayhana dinhi sa ato...”

“Aw, unhan nako siya. Akoy makauna pagdimdim sa kaanindot sa lawas ni Encarnacion, bay Pidot, he, he, he,” nagpanilap si Marcos.

Tuod, usa ka mamingaw’ng gabii, dihang nananggot na usab si Inok kay ang iyang tatay nanagat man, nakadungog siya’g tingog sa usa ka babaye nga nangayog pakitabang ug didto magagikan ang tingog sa balay’ng karaan nila ni Encarnacion.

Midali siya’g kanaog sa lubi ug midagan paingon sa karaang balay nila ni Encar ug milili dayon siya sa giwang sa bungbong nga mora’g gikaon sa anay ug maoy iyang nakita ang hubo nga lawas sa dalaga nga gigapos sa mga bungbong dapit sa bentana.

Ug iyang nakita si Marcos nga mikupog sa hubo nga lawas sa dalaga. Ug tungod niini midali siya’g balik sa iyang agi kay gibati siya’g kahadlok. Maton ra ba si Marcos ug gikaintapan dinhi sa ilang baryo.

Pagka-ugma, nakugang si Inok sa balita nga si Marcos gipatay ug nakuniskunis kuno ang kalawasan niini. Gikuha ang atay ug kasingkasing lakip na ang kinatawo niini. Dinhi nanglimbawot ang balhibo ni Inok ug nagtuo siya nga si Encarnacion ang mipatay kang Marcos pinaagi sa pagbalbal niini. (Kataposan)