Ang kapalaran

Gula 4

Misugod na unta si Wendell pag-arangkada sa ikaduhang hugna sa ilang kumbati ni Christy sulod sa iyang opisina, apan misirbato ang iyang buzzer katulo.

“Pag-ilis, Christy, pagdali, miabot ang akong misis,” giingnan ni Wendell si Christy kinsa dali usab kaayo nga nakatimbakuwas ug nagsul-ob dayon sa iyang underwer, short pants ug T-shirt.

Milingkod pagbalik si Christy sa lingkoranan atubangan sa lamesa, samtang si Wendell nga dali ra kaayong nakasul-ob sa iyang sapot, mi-unlock sa siradora sa pultahan og milingkod.

Taud-taud, may nanuktok ug mibukas sa pultahan. “May bisita ka diay,” matud sa asawa ni Wendel nga may pagka abubhoan. “Siya si Christy, taga Bohol nga nangaplay pagka dancer,” abtik nga tubag ni Wendell.

Gikulbaan kaayo si Wendel kay kun mabuksan sa iyang asawa ang gamay’ng kama sulod sa iyang opisina, sigurado nga mabuking sila kay may mga lama pa didto sa ilang kumbati.

“Aw sigi Christy, balik na unyang gabii para makasugod ka na sa imong pagsayaw,” gidispatsar na ni Wendell si Christy kay buot niya nga dad-on usab dayon sa gawas sa opisina ang iyang asawa.

“Adto diay usa kita sa bookstore, paliton nato kadtong requirement sa tunghaan ni Jolly,” giagbayan ni Wendell ang asawa paingon sa gawas.

Pagdayon og gawas ni Wendell, gipikpik niya ang abaga sa usa ka tawo nga nagbantay sa ganghaan sa Sanciangko’s Wildflower. Mao diay kini ang mohatag kaniya og sinyas kun moabut ang iyang asawa.

Pagka gabii, wala gihapon mopauli si Wendell. Bisan og duna siya’y floor manager nga maoy modumala sa bar, apan didto gihapon si Wendell. Ang iyang tumong mao diay ang pagtan-aw ni Christy sa unang gabii sa iyang pagsayaw.

Nadani g’yud kaayo si Wendell sa porma sa lawas sa Bol-anong dancer, apan labaw na g’yud sa iyang kaanyag. Tan-aw ni Wendell, mas misamot ang kaanyag ni Christy nga nangarte na.

Human sa pagsayaw ni Christy, gipatawag niya ang Bol-anong dancer ug gipalingkod tupad kaniya. Apan taud-taud, giduol siya sa floor manager ug gihunghongan nga miabot si Arthur, usa ka opisyal sa City Hall.

Kaila sila Wendell ug Arthur kay mao kini ang motabang kanila pag-follow-up sa papeles sa bar didto sa City Hall.

Giduol ni Wendell si Arthur sa unahan nga lamesa. Wala niya damha nga nasiplatan diay ni Arthur si Christy ug mao kini ang gihangyo nga iyang itibol. Wala g’yud makabalibad si Wendel kay daku kini’g natabang kaniya. (Sumpayan pa)