Gula 11
“Papahuwaya una ninyo siya,” giingnan niya ang iyang sakop nga si Ka Henry. “Pakigsultihan ko siya pag-usab ugma sa buntag.”
Gidala dayon siya ni Ka Henry ngadto sa usa ka payag.
“Mao na kini ang imong pinuy-anan sukad karon,” nagkanayon si Ka Henry dihang nakasulod na siya sa payag. “Akoy imong kauban ning maong payag. Nanghinaot ko nga dili ka mabag-ohan niining lahi mo nang kalibotan.”
“Tungod ug alang sa kawsa sa masa,” ni Ronald pa, “andam kong magsakripisyo.”
Mihigda na si Ka Henry, wala na magtingog. Nangita na lang usab si Ronald og puwesto sulod sa payag nga kahigdaan. Kadali ra siyang nakatulog.
Taas na ang gintang sa adlaw gikan sa kasidlakan sa pagmata ni Ronald. Gisud-ong niya ang katahom sa kabuntagon sa bukid sukad sa hagdanan sa payag diin siya naglingkod. Wala madugay, dihay miduol kaniya.
“Paadtoon ka ni Kumander Abay,” nagkanayon kini.“May mahinungdanon siyang pakigsultihan kanimo.”
Naabtan niya si Kumander Abay sa payag niini nga naghigop og kape nga hinimo sa pinaig nga mais. Nangatahoran siya. Mibalos kini pagtimbaya kaniya. Unya gitunolan siya niini og usa ka tasa sa kape nga pinaig. Mihigop dayon siya. -- Sumpayan pa